Chanmari an chelh

Zote Toyota MPL10-ah chak vek an awm ta lo. Nimin tlai khan match thuma vawi thum chak thei Chanmari FC chu MPL champion lai Chawnpui FC nen goal awm loin an inhnehtawk.

1st Bn MAP Ground-a inkhelah Chawnpui froward Malsawmzela'n (Valpuia) keeper Zothanmawia (Tmawia) chiah a hmachhawn hnuah a pet over a, bench aṭanga lut K. Lalrosanga pawhin defender bumin petna khawp insiam mah se a pet over ve tho bawk.

Chanmari pawhin chance ṭha an nei a, Lalkhawpuimawia'n lei hrulah petin goal kila lut tur chu keeper John Lalruatfela'n a dang hman. John hian Laltlanzova (Zozoa) goal khung tur dang leh bawkin Dinthar tlangval hi man of the match-a thlan a ni.

K. Malsawmkima kaihhruai Chanmari FC-in point 10 hmuin pakhatna dinhmun an luah chhunzawm a, Lalrindika Hmar hnuaia khel Chawnpuiin point riat hmuin pahnihna dinhmun an luah bawk.