US OPEN : Fanu rangkachak Gauff hun a thleng ta
Tennis ngaina ram United States chuan fanu rangkachak thar an nei ta, a hming chu Coco Gauff a ni - kum 19 mi chauh ni chungin Gauff-i chuan US Open nomawi a chawi a, title dangin a zui zel pawh a rinawm.
Inrinni zanlaia US Open 2023 final inkhelah Gauff hian a khingpui Aryna Sabalenka lakah set hmasa ber a hloh, mahse darkar hnih leh minute ruk an khelh zawh meuh chuan 2-6, 6-3, 6-2 in a chak zawk a, a vawi khat nan Grand Slam nomawi a chawi.
Australian Open champion Sabalenka erawhin major title pahnihna tur a nghah leh rih a ngai dawn, tun kara world ranking chhuak tharah erawh Iga Swiatek nek chhuakin a chung berah a awm thei dawn tho.
Mi bik Gauff
Wimbledon 2019 an khelh lai khan Gauff hi kum 15 mi chauh a la ni a, mahse khawvel barakhaihin theihna nei sang leh player danglam bik a nihzia a lantir daih tawh, tunah chuan a hun ṭha a thleng ta - a theihna thlir chuan a mak hran lo.
Serena Williams (1999) chu kum 20 tlin hmaa Grand Slam champion thei a lo ni tawh, ani hnu lamah chuan Amercan nula zingah hetiang ti leh thei hmasa ber a ni hial, legend Serena hnung a zui thei ang em tih erawh sawi lawk a harsa thung.
Seeded parukna Gauff chuan, "Ka pa nen kan inkuah a, mahse a hmel kha ka hmu miah lo, a ṭap ri erawh chu ka bengin a hria, khatianga ka pa a ṭap rik kha ka vawi khat hriatna a ni hial. Ka nu kha chu ka chak emaw ka chak lo emaw a ṭap dawn tih ka hre sa," a ti.
A puitling ta
A lar hma avangin kum 20 a tlin hmain sulhnu hrang hrang a nei hman a, mi ṭhenkhat chuan tleirawl lar a nihna bak kha a thlensan pui dawn lo emaw ti tawk pawh an awm a, thil mak pawh a ni hran lo.
Mahse, tunah chuan Gauff hian US Open khelh hmaa a sawi ang khan tennis court chhungah a puitling tih a takin a lantir. Wimbledon-ah khan hneh nei loin a tla nghal a, a hnu lamah erawh match 19 a khelh leh tawh zinga 18-ah a chak thei hial.
US Open champion ni tur hian match sarih a chak zinga paliah chuan set thum an khelh a ngai a, final kalkawngah hian world number 1 hlu Caroline Wozniacki pawh a hneh, final boruak sanga set a hloh hmasak hnu pawhin huaisen takin a bei let thei a ni.
A inringtawk
Gauff hlawhtlinna hian North America a luahkhat hneh hle a, khawvel hmun hrang hranga tennis ngainatute titi tui tak pawh a tling. Gauff chuan, "Ka chunga rinna nghat ngam lo tute chungah lawmthu ka sawi, anni khan rilru huaisenna min siamsak.
"Thla khat liamta khan Washington-ah WTA 500 title ka la, ka tawpna turah an ngai. Mahse, Cincinnati-ah Masters 1000 title ka la leh a, tunah chuan Grand Slam champion ka ni ta," tiin beidawng loa a beih thu a sawi bawk.
Tun kara tennis world ranking chhuak tharah chuan Gauff hi world number 3 a ni dawn tawh a, doubles lamah chuan number 1 a ni tawh ang - tennis a khelh hun chhunga a ranking san lai ber a tawng chho dawn a ni.