Pele khumtu Neymar

World Cup champion hnem ber chu Brazil an ni a, an ram tana goal khung hnem ber chu Pele a ni ṭhin. Tunah chuan thawnthu ziah danglam a ni - Brazil tana goal khung hnem ber chu Pele ni loin Neymar a ni ta.

Inrinni zing khan Brazil chuan World Cup qualifying-ah Bolivia 5-1 in an sawp a, he inkhelah hian Neymar chian penalty hlah mah se goal hnih dang a khung ta tho a, tun hma lamah Pele nen record inṭawm (77 goals) an neih chuan goal hnihin a khum.

Brazil tana match 125 khel tawhtu Neymar chuan, "Hetiang record hi chu ka beisei ngai loh thil a ni, goal khung tam zawk ni mah ila Pele aia player ṭha ka ni tihna chu a ni chuang lo," tiin a sawi.

Pele khan kum 1957 aṭanga kum 1971 inkar khan Brazil tan match 92 aṭangin goal 77 a khung a, an ram hi World Cup-ah vawi thum ngawt a champion pui. Nikum December thla khan kum 82 mi niin a thi tawh a ni.

Inkhelh thiam leh mi bik a nih avangin Pele kha 'King of Football' tia sawi a ni ṭhin. A social media enkawltu chuan X (Twitter) lamah Neymar an lawmpuina thu hi a ziak a, coach Fernando Diniz pawhin Neymar chu mi bik a nih thu a sawi ve bawk.