Ban theih dinhmuna ding Germany coach

Germany-in FIFA World Cup 2022-a an hneh loh Japan chu an mual Volkswagen Arena-ah 4-1 in an hneh lo nawn. Euro 2024 khelhna tur hi Germany a ni a, tun hnaiah an result a ṭhat loh avangin an coach Hansi Flick chu ban theih dinhmunah a ding.

September 9, Inrinni zan inkhelah hian Germany tan Leroy Sane-a'n khung ve bawk mah se siphurh sutna chauh a ni a, Japan tan Junya Ito, Ayase Ueda, Takuma Asano leh Ao Tanaka ten an khung. Blue Samurai hmaah Germany an mualpho.

Mualphona chu

Hansi Flick-a'n kum khat a liam hnuah pawh Germany ṭhat dan ber tur a la hre lo a, Joshua Kimmich chu right back-ah dah niin Ilkay Gundogan chu midfield laia dah a nih bakah captain atan dah a ni bawk.

Mualneituin bul ṭan chhelo mah se Japan-in Junya Ito hmangin minute 11-naah a khung. Flick-a hoten pressure an ngah hmain Florian Wirtz-a ball pek chu Sane-a'n goal kilah a dah a, minute 19-naah 1-1 a ni.

Mahse, French club Reims forward Ito-a cross chu Feynoord striker Ayase Ueda-a'n minute 22-naah a khung lehnghal. Japan an khel ṭha hle.

Germany-in nawr viau tum a, siphurh sutna an hmu thei lo. Minute 90-naah an nawr luat an tuar lo a, Barcelona youth system chhuak Takefusa Kubo siam chu VfL Bochum forward Asano-a'n awlsam takin a khung.

Injury time-ah Real Sociedad winger Kubo siam chu Ao Tanaka-a'n a khung leh bawk. Germany an mualah an mualpho a, Japan lakah 4-1 ngawtin an tlawm.

Coach ban a hnai?

Germany captain Ilkay Gundogan leh midfielder Joshua Kimmich ten Japan aia an khel ṭha lo zawk tih an pawm ve ve. Germany director of football Rudi Voller chuan an result chu zahthlak a tih thu a sawi bawk.

German football journalist Raphael Honigstein chuan kar liam ta tir lam khan Germany-in tun international break match hniha an result a ṭhat loh chuan Flick hi ban thei dinhmuna an din thu a lo sawi tawh.

Germany hian September 12, Thawhlehni zan dar 12:30 hian Signal Iduna Park-ah France an mikhual leh dawn. Flick hi an ban a nih chuan Bayern Munich ban tak Julian Nagelsmann-a'n team enkawl a nei lo tih hriat a ṭha.

Chutihrualin Flick hian Germany tana coach ṭha berah a la inngai a, ban mai a la tum lo. Les Bleus an hmachhawn hunah German player-ten an coach Flick-a'n a hna ngai a la chelh theih nan theihtawp an chhuah a ṭul a ni.