Spain tana goal khungtu - kum 16 mi Lamine Yamal
Lo chhinchhiah rawh - a chanchin i la hre dawn chauh! Spain tana a match hmasa berah kum 16 mi Lamine Yamal chuan goal a khung nghal a, Euro 2024 qualifier-ah Spain chu chiang takin hnehna a chanpui.
Spain hian an mikhualna ramah Georgia chu 7-1 ngawtin an sawp a, Atletico Madrid striker Alvaro Morata chuan hattrick siamin, Solomon Kvirkvelia chuan an lamah a tilut a, Dani Olmo leh Nico Williams ten goal khat ve ve an khung bawk - Georgia tana Giorgi Chakvetadze goal khung vein awmzia a nei phak lo.
La Roja hian qualifier match thum an khelh aṭanga point ruk an hmuhna chiah a ni a, group A-ah pahnihna an ni - an chungah hian 3-0 a Cyprus hnehtu Scotland an awm a, Scottish team hian match nga aṭangin point 15 an nei tawh. He group-ah hian Erling Haaland-a team Norway an awm bawk tih hriat a ṭha.
Rawlthar duhawm
Barcelona rawlthar duhawm Yamal hian April khan Catalan club tana a match hmasa ber khelin, Barcelona tana La Liga-a inlan thei naupang ber record a siam - kum 15, thla kua leh ni 16 mi a ni! A hming chher zuiin, Barca match hnuhnung pathumah bul a ṭan vek!
Villarreal laka 4-3 a an chak ṭum phei chuan assist vawi hnih neiin, man of the match-ah thlan a ni a, tunah football ram ropui Spain tana inlanin, goal hial a khung zui - Yamal hi kum 6 leh ni 57 mi a ni a, Olmo thlakin bench aṭangin a lut.
Kum 17 leh ni 62 mi nia Spain tana inlan Gavi record khumin, Spain tana inlan thei naupang ber a ni a, minute 74-naah goal a khung zui avangin Spain tana goal khung thei naupang ber record a siam bawk.
Mumang ram
Yamal chuan, "Spain tana ka match hmasa ber ka khelh avangin ka lawm a, goal ka khung nghal avangin ka hlim êm êm bawk. Ka tan chuan duhthusam thleng dik a ni a, mumang ramah ka cheng mek a ni.
"Ka hlim êm êm a, Spain tana ka khelhpui leh ka chunga rinna nghattu coach chungah lawmthu ka sawi bawk - ka zinkawnga min ṭanpuitute zawng zawng chungah lawmthu ka sawi e," a ti a, Yamal chanchin kan la hre dawn chauh niin a lang.
Yamal hian Spain Under-15, Under-16 leh Under-17 tana khel tawhin, U17-ah hian match 10-ah goal riat a khung a, U19 tan match khat chiah a khel hman tihin, Spain senior team tan a inlan a, goal a khung bawk!
Hello Morata
Kum 30 mi Morata-a'n Spain tan hattrick a siam a, ram tan innghahna tlak a nihzia a pholan chhunzawm zel - ram tan match 65-ah goal 33 a khung tling ta a, ram tana hattrick a siamna hmasa ber a ni bawk.
Spain tana goal khung hnem ber David Villa chuan match 98-ah goal 59 a khung a, Raul (102 matches, 44 goals), Fernando Torres (110 matches, 38 goals) leh David Silva (125 matches, 35 goals) ten an dawt.
Atletico Madrid striker hian David Villa record khumin, Spain tana goal khung hnem ber a ni thei ang em, sawi thiam a harsa a, pathumna dinhmun luah tura Chelsea striker hlui Torres a khum ngei erawh a rinawm.
McTominay chu!
Manchester United midfielder Scott McTominay hi a tam zawk chuan goal khung thei angin kan hre kher lo ang. Mahse, Euro 2024 qualifier lamah chuan Scottish midfielder hian nuam ti takin goal a khung zel!
Scotland hian Zirtawpni zan vek khan Cyprus chu 3-0 in an sawp a, McTominay chuan minute rukna lekah goal hmahruai khungin, Ryan Porteous leh John McGinn chuan an belhchhah bawk - Scotland an chak a, match nga aṭangin point 15 an nei ta.
Kum 26 mi Tominay hian qualifying match nga a khelhah goal ruk a khungna chiah a ni ta a, Cyprus laka McGinn goal khung chu a siamsak a ni bawk. Euro qualifier-ah hian McTominay hi Belgium striker Romelu Lukaku leh Denmark striker Rasmus Hojlund te nen top scorer an ni mek.