Ngannou laka ka tlawm chuan min nuih rawh u - Fury

British boxer rothap Tyson Fury chuan Francis Ngannou lakah a tlawm a nih ngat chuan, boxing khawvelin an nuihsawh a nih pawha a pawm thlap tur thu a sawi - Fury leh MMA star Francis Ngannou te hi October 28 khian Saudi Arabia-ah an inhnek dawn.

WBC heavyweight champion Fury chuan, "Ka theihna sang bera ka khelh a ṭul dawn a, boxing fight dang aiin ka tan chuan a hlauhthawnawm zawk dawn - MMA fighter lakah ka tlawm a nih chuan khaw êng ka hmu ngam kher tawh lo ang. Mipuiin min nuihzatin, fiamthu thawh nan min hmang reng tawh dawn a ni," a ti.

Kum 35 mi Fury hmachhawn tur Ngannou hi UFC heavyweight champion ni chunga UFC thlahtu kha a ni a, MMA lamah hriat hlawh viau mah se professional boxing lamah erawh record a la nei lo.

Hei vang hian Fury-a'n dem leh sawisel a tawk nasa a, a bik takin Anthony Joshua emaw Oleksandr Usyk emaw a hnek loh vang a ni ber - Fury hian boxder pahnih hi inbiakna pawh a neihpui ngei a, mahse, inremna a awm thei ta lo a ni.

Fury chuan, "Ṭum dang zawng aiin ka tan chuan he fight hi a pawimawh dawn. Media lam chuan an duhdanin lo tarlang se la, mahse, Tyson Fury hi chuan a ti mai mai dawn lo - Ngannou hneh tur hian ka fit leh chak theih dan berin ka rawn inbuatsaih dawn a ni.

"Chutianga ka ti lo a, ka tlawm a nih ngat chuan min nuih vek rawh u. Chutiang chu a thleng a nih chuan ka phu ve reng vang a ni bawk ang," a ti a, Fury hian hnehna chan a tumruh hle.

Fury hmachhawn tur French-Cameroonian Ngannou hi MMA a luhchilh hmaa boxing-a hming chher tum a ni a, a hnek natna leh mi a knockout theihna chu a larpui niin, boxing legend Mike Tyson chuan training a neihpui dawn.

Ngannou chuan, "Fury chu ka tawrhpui hle - a hming put chhan Mike Tyson hian min ngaina zawk tlat a ni," tiin fiamthu a thawh a, boxer nih chu a thil châk ber zinga mi a nih ṭhin thu sawi zuiin, "Naupang tê ka nih lai aṭang tawhin boxer nih hi ka châk ṭhin. Boxing ka khel dawn a ni mai lo a, a tawnsan vanglai tak tawngtu ka hmachhawn dawn a ni," tiin a phur hle.

UFC a chhuahsan hnua Professional Fighters League (PFL) lama lut Ngannou chuan, "Enge thleng dawn tumahin an hre lo. Mahse, chiang taka ka hriat erawh Fury lu hi ka veh dawn a ni. Chhuatah tluin, tho tawh lo ta se, chu chu eng tihna nge ni ang?

"Khawvela boxer ṭha ber ka ni mai ang em? Khawvela number 1 ni lai ka hnehte chuan number ka ni mai dawn lawm ni," a ti a, khawvela boxer ṭha ber ni nghal tura Fury hneh a tum thu a sawi - Fury belt kawl lai WBC heavyweight title erawh inchuh a ni dawn lo.

Ngannou hian MMA fight vawi 20 hmachhawn tawhin vawi 17 a chak a, vawi 12 chu knockout-in a chak. A hmachhawn tur Fury hian boxing-ah vawi 34 fight hmachhawn tawhin vawi 33 a chak a, vawi khat a draw - a chak zinga vawi 24-ah a khingpui a knockout.

6ft 9in-a sang Fury chuan, "Boxing ring chhungah ka hneh phawt che ang a, cage-ah ka tudawl leh ang che," tiin Ngannou hi a ṭawngkhum a, a ṭawngkam aṭanga teh chuan MMA fight hmachhawn a hreh hran lo niin a lang.