VVD-a'n hremna a tawrh belh dawn

Liverpool captain Virgil van Dijk chuan Newcastle United nen an inkhelh ṭuma a chet dan mawi lo a pawm avangin hremna a hmuh belh dawn a, red card a hmuh avanga hremna pangngai bakah match khat khel thei lo tura hrem belh niin, £100,000 chawi tura tih a ni bawk.

Liverpool hian August 27 khan Newcastle United chu khualmualah an lenchilh a, goal an chhuah hmasak hnuah VVD chu Alexander Isak lakah foul-in red card a hmu - Dutch defender hian mawi lo takin referee John Brooks a ṭawngkhum zui a, a chhuah pahin fourth official a ṭawngkhum bawk.

Reds hian 2-1 in hnehna chang zui mah se, an captain chet danin ngaihven a hlawh zui a, red card a hmuh avanga match khat hrem a nih bakah match khat dang hrem belh a ni. VVD hian 3-0 a Aston Villa an hneh ṭumin a hmel a lan lo a, September 16-a Wolverhampton Wanderers an lenchilh hunah pawh a inlan thei lo zui ang.

Football Association chuan thuchhuah siamin, "VVD hian mawi lo taka chein, match official a ṭawngkhum tih a inpawm thlap a, chuvang chuan independent regulatory commission chuan hremna hi a ti chhuak ta a ni," an ti.

Van Dijk chuan social media lamah hrem a nihna chu a pawm thu sawi zuiin, "Thuneitute thutlukna ka pawm thlap a, Liverpool ka zawm hnua ka red card hmuh hmasak ber a nih avangin a hunlai khan ka insum zo lo a ni.

"Inkhelh zawh rual khan match official-te hnenah ngaihdam ka dil nghal a, ka tihdik loh kha ka pawm thlap a ni," a ti a, kum 32 mi defender chuan thil thleng avanga a inthiam loh thu a sawi.

Referee chief Howard Webb chuan match official-te chuan player leh coach te chet dan mawi lo chu an en liam mai mai loh tur thu sawiin, VVD-a red card chu a dik thlap thu a lo sawi tawh bawk.