Saudi lamin Salah thlah an tum lo

Al Ittihad chuan tun nipui transfer-ah Mohamed Salah la thei ta lo mah se, Saudi lam chuan Liverpool forward hi bansan mai an tum dawn lo niin a lang a, Saudi Pro League director of football Michael Emenalo chuan Salah an thlithlai zui tur thu a sawi - Reds fan-te u in beng hnawh ru!

Kum 31 mi Salah hi Karim Benzema khelhna Al Ittihad hian pound maktaduai 150-a lakluh an tum a, mahse, Liverpool chuan he dawrna hi an hnar. Reds-in an dawrna an hnar hnuah hian Saudi club hian £200mtd aia tama dawr leh an tum nia sawi a ni a, khawvela footballer man to ber nih tir an huam - mahse, hei erawh a thleng ngei em, hriat a ni lo.

SPL hotupa Emenalo chuan, "Mohamed Salah hi khawvela footballer ṭha ber pawl a ni a, a hmaa ka sawi fo tawh angin he league khelh duhte chu lawm takin kan pawm zel - chung zingah pawh chuan Salah a tel ve.

"Mahse, inzahpah lo taka thil tih nghal buan buan kan duh lo a, SPL chuan inzahtawn tak leh awmze nei taka indawr hi a duh zel a ni. Tun nipuia Salah kan lakluh loh chhan kha kan duh loh tak thut vang a ni hran lo a, Liverpool nena buaina kan neih vang pawh a ni chuang lo. Kan vaia lungawi taka kan inremna tur pakhatah kan inrem theih loh vang mai a ni.

"Thinrimin kan inṭhen hran lo a, hmalam kan pan chhunzawm zel. Chutihrual chuan kawngkhar hi khar a la ni lo a, kan tihdik lohte siam ṭha a, Saudi Pro League-a Salah hruai luh theihna tur a nih phawt chuan lawm takin kan pawm ang," a ti a, SPL-a Salah khelhtir ngei a duh.

Kum 31 mi Salah hian Liverpool tan nomawi chawi theih ang chu a chawi kim a, match 309 khel tawhin goal 188 a khungsak der tawh a, assist vawi 81 a nei bawk - a sulhnu a ropui a, Anfield-ah chuan legend a ni der tawh.

Liverpool boss Jurgen Klopp chuan, "A chanchin hi an sawi nasa êm êm a, mahse, keini chu hahdam takin kan awm. Kan player a ni a, ani pawhin he hmuna awm hi nuam a ti a ni," tiin a player chungchang hi a lo sawi tawh.