Number 1 Alcaraz a tla

Carlos Alcaraz chuan US Open nomawi a kawl lai a humhim thei lo. Spanish tlangval hian semifinal inkhel hmuhnawmah Daniil Medvedev chu 7-6 (7-3), 6-1, 3-6, 6-3 in a ngam lo a, final thleng zo loin a zinkawng a tawp.

Inrinni zing semifinal inkhelah Alcaraz hian tihsual a nei nasa, set hnuhnung ber an khelh lai hian Medvedev-a service chhuhsak theihna remchang nei nual mah se hun pawimawh laiah a chefuh thei tlat lo, a chak lo zawka a ṭan a ngaih phah ta a ni.

Semifinal inkhel dangah Novak Djokovic chuan tualchhung tlangval Ben Shelton chu 6-3, 6-2, 7-6 (7-4) in a hneh thung a, nizan zanlai khan Djokovic leh Medvedev ten nomawi an inchuh zui a, result kan hre hman lo.

Kum 20 mi Alcaraz hian nomawi a hloh a ni satliah lo, tun inelna zawh rual hian Djokovic chu world number 1 thar a ni tawh dawn - ranking bik erawh Alcaraz hi champion leh pawh ni se an dinhmun a inthlak dawn tho a ni.

Spanish tlangval Alcaraz chuan, "New York khawpui hi ka pian leh seilenna hmun ang maia nuam a ni, a chhan chu min ṭantu tam tak an awm vang a ni. Tunah chuan a vanduai zawkah ka ṭang ta si.

"Tunah in mangṭha mah ila, hei hi ka tawpna tur a ni dawn lo. Kum tharah kan inhmu leh ngei dawn nia," a ti. Wimbledon title a lak tho avangin atan season ṭha tia sawi ngam a ni tho.