Final-ah Mizoram Vs Manipur

Hero Sub Junior Boys National Football Championship semifinal-ah Mizoram chuan nimin khan Uttar Pradesh 1-0 in an hneh a, goal awmchhun hi Sihphir naupang Isak Lalmalsawma'n extra time-a a khung a ni. Final-ah Mizoram leh Manipur an inkhel dawn a, inkhel ngaihven hlawh bik a ni ang.

Malda DSA Stadium, West Bengal-ah Mizoram leh Uttar Pradesh te goal awm loin hun pangngaiah an inhnehtawk. Extra time khelh a ni a, minute 94-naah Chanmari naupang Malsawmkima ball vawrhluh chu Isak-a'n box chhungah rilru fim puin mak taka a insiamrem hnuah ṭha zetin a pet goal.

Sihphir naupang Isak hi hian Mizoramin Maharashtra 9-0 a an hneh ṭumin goal nga a khung a, Kerala 1-0 a an hneh ṭumin a inhliam. Group match hnuhnung bera Odisha 5-1 a an hneh ṭumin Isak hi a inlan thei lo a, semifinal-ah bench aṭanga lutin Uttar Pradesh lakah chakna goal a khung.

Coach HC Zarzoliana chuan, "Kan khel zawn rei ta deuh a, kan naute an chau deuh a ni. Isak-a kha a la dam chiang lo a, mah se 'risk' kan la a, kan tifuh," tiin Vanglaini a hrilh.

Manipur hian final lut turin Arunachal Pradesh 3-0 in an hneh a; September 13, Nilaini hian Berhampore-ah final khelh a ni ang. Mizoram hian vawiin hian Berhampore an pan ang.