US OPEN : Djokovic tan Grand Slam Nomawi 24 Champion hnem ber a nih rual ta!
Mipa tennis huanga Grand Slam champion hnem ber Novak Djokovic chuan US Open 2023 nomawi a chawi leh ta a, tunah chuan hmeichhe lama record nei ṭha ber Margaret Court (24 titles) a nih rual ta - khum turin hun ṭha a nei ngei dawn ni pawhin a lang.
Serbian star hian nimin zinga khelh zawh tak US Open final-ah Daniil Medvedev chu 6-3, 7-6(5), 6-3 in a hneh. Set hloh loin a chak a, an inkhelh hun chhung erawh darkar thum leh minute 16 a tling, point khat lek hmu tur pawhin an beih nasat a ngai thei hle.
Grand Slam nomawi 24 a nei tling ta chiah a, hmeichhe player ropui Court-i nen an champion hnem lam a inzat. Djokovic hian season thara Australian Open an khelh hunah champion hnem ber nih theihna remchang a nei ang, mipa bikah erawh champion hnem ber a ni tawh.
Final hmuhnawm
Tennis player-ten inkhelh thiamna hmun an nei ṭheuh - Djokovic leh Medvedev te hi hard court-a inkhel thiam bik an ni a, an tan chuan US Open hi hmun nuam a ni. Final khelh hma boruak thlir chuan champion tur zawk pawh sawi thiam a harsa.
US Open 2021 final-ah khan an lo intawng tawh a, inkhel hmuhnawmah Medvedev zawk a chak. Russian tlangval hian an intawn tawhna a la hre reng a, a hlawhtlinpui tawh ang bawka khelh nawn a tum tih pawh a lang.
A kum naupang zawk a ni bawk a, hun hman rei a pawi ti lo. Baseline aṭangin ball a vaw nasa a - Arthur Ashe Stadium chhung boruak a lum lehpek hle, set khatna erawh tawnhriat nei zawk Djokovic kutah a lut leh phawt.
Set hnihnaah Medvedev-a'n set lak theihna remchang a nei, point khat lek hmuh belh ni se set a la ang. Mahse, beidawng ve ngai lo Djokovic bawk chu tie break an khelh hnua a chungnung zawk a ni leh a, a vannei lo zawk a ni.
Player pahnihin service an nei ṭha dun a, an inbeih bul ṭanna ber pawh a ni zel. Kum 36 mi Djokovic-a'n a service vawi khat chauh a hloh a, a khingpui service vawi thum chhuhsak thungin, a phu ang ngeiin a chungnung zawkah a ṭang.
A chungnung
Mipa player zingah chuan Djokovic aia Grand Slam champion hnem an awm lo, amah hnaih bertu Rafael Nadal aiin title pahnihin a nei hnem zawk, thil mak danglam tak a thleng a nih ngawt loh chuan season tharah Nadal hi a chawl tawh ang.
US Open final an khelh zawh hnuah Medvedev chuan, "Helai hmunah hian eng nge i la tih ve reng? Engtikah nge i tlak hniam ve ang tih pawh ka hrethiam lo," tiin Novak a fiam a, fiamthu ni mah se hei hian Djokovic ṭhat reizia a tilang chiang hle.
Djokovic-a coach Goran Ivanisevic chuan, "Infiamna khawvela thil thleng ropui berte zinga mi a ni, hei hi tennis chauh ni loin infiamna pumpui ka sawina a ni a, thawnthu ngaihnawm hi a la tawp mai lo bawk ang.
"Australian Open 2024 khelh hunah a champion a nih chuan major title 25 a nei dawn, chutiang chu a thleng thei a nih chuan engvangin nge title 26 pawh a theih loh ang ni, a taksa a enkawl ṭhatna hian rah ṭha a chhuah," a ti.
Djokovic erawhin Grand Slam nomawi a chawi duh zat a sawi mai thei lo a, a hun hnuhnungah pawh a ṭha ber nih a duh tih erawh a sawi. Ranking sang lo leh player dangte pawhin an hneh kual theih hnua chawlh ai chuan ṭha tak chunga chawlh a duh.
Medvedev a inchhir
Grand Slam champion ni turin theihna a nei a, semifinal-ah world number 1 Carlos Alacaraz lakah inkhel hmuhnawm chhawp chhuakin a chak thei, mahse nomawi inchuhna inkhelah a beisei angin Medvedev a khel chhuak lo.
Kum 26 mi Medvedev chuan, "Chak thei ka ni ve tho a, hnehna chang tur leh set la tur pawhin remchang ka nei. Mahse, a chang chuan tennis hi a awlsam vek bik lo a, harsatna leh lungngaihna min thlen chang pawh a awm.
"A hmasa berah chuan line bul hnai lutuka vuak ka tum fo kha a pawi, vuak sual ka ngah phah. Vaw dik hmasa phawt ni ila chuan thil pawh a danglam thei deuh ang, mahse siamṭhat nghawt theih a ni tawh si lo.
"Sir tak taka ka vuak phei pawh a lo la hman zel a, point inchuha rei tak tak ball kan inpek tawn pawhin a tawpah a dingchang zawkah a ṭang zawk zel, theih ni se la chuan ka khelh dan phung kha thlak ka duh," a ti a, mahse thil theih a ni tawh si lo a ni.
Player pahnih intawn tawhnaah Djokovic hi vawi 10 a chak tawh a, record nei ṭha zawk a ni - Medvedev pawhin ṭum nga chu hnehna a chang ve tawh bawk. An inkarah kum kua ngawt a tla a, a upa zawkin thahrui a ngahin a la fei zawk tlat si a ni.
New York kir lehna
Hriat ngai loh hripui a lo leng a, khawvel kan buai zo a nih kha. Khawvel ram ropui ber United States pawh a buai, hri leng hmachhawn dan thiam viau mah se ram dang aṭanga zin lut tur chungchangah erawh inkhuahkhirhna an nei khauh hle.
US sorkar an khauh a, hetiang chiah hian Novak Djokovic pawhin ngaihdan nghet leh khauh tak a nei ve bawk. Serbian star hian hri leng laka invenna damdawi (vaccine) a la duh lo, hei hian a tennis zinkawng pawh a nghawng.
Vaccine la lo tan US-ah a zin theih si loh, hei vang hian season hmasa khan US Open a khel thei lo - Australian Open aṭang pawhin an thawn haw, amah ṭantu tam tak chuan vaccine la mai se, tournament khel tam se an duh.
Mahse, ngaihdan nghet tak neitu Djokovic hian Grand Slam khelh ringawt ai chuan a hriselna a ngai pawimawh zawk. Tunah chuan atan hun ṭha a inherchhuak ve leh ta a, US leh Australia ramah pawh vaccine la lo tan a zin theih tawh.
Australian Open 2023 title a la a, ropui takin Melbourne khawpuiah a kir tih kan la hre vek ang. Tunah chuan, nikuma zin an phal lohna New York khawpuiah ngei US Open nomawi chawi chungin hnehna hlado a chham leh ta.
Inkhelh banah Djokovic hian a chhungte a kuah a, major title hi lo la fo tawh mah se a lawmawm dan a la pangngai reng tih a hriat theih a, a champion hmasak lama a lawmna ang tho kha a la nei thei reng.
A bik takin tun season kal laia Australian Open leh US Open a lak hi a hlu danglam hle ang tih a chiang, mi tam takin nikuma a inlan loh avangin an uipui a, tunah erawh hlawhtlinna hmangin an beisei a tihhlawhtlinsak a ni.
A la tawp mai dawn lo
Tun kara world ranking chhuak tharah chuan Novak Djokovic hi pakhatna a ni dawn, chanchinbu i chhiar chuan ranking sang berah a awm fel leh tawh ang - kum 36 mi ni tawh mah se khawvela ṭha ber a la ni thei tlat.
Mipa tennis thuneitu sang Association of Tennis Professionals (ATP) chuan kum 1973 aṭang khan world ranking an siam ṭan a, chawlhkar khat zela chhiar ṭhin a ni. Djokovic hi tun kar chhiar telin kar 390 chhung number 1 a ni ta, record nei ṭha ber a ni bawk.
Djokovic chuan, "Mahni intuai thar reng a ngai, a chhan chu midang hian min nghak bik miah lo, an inchher hriam ve reng bawk a ni. Tennis tan hian sulhnu ṭha tak hnutchhiah ngei ka tum, chumi tur atan chuan player naupang zawkte thil tam tak ka zirtir ve theih pawh ka beisei.
"A nihna takah chuan Grand Slam nomawi 24 la chawi tling ang tih hi ka ngaihtuah phak ngai lo, duhthusam lamah te chuan a lo awm ve mah se a tak ram em a thlen hi chu ka beisei ngam ngai lo a ni.
"Mahse, engtik lai emaw aṭang kha chuan ngun takin ka chhut a, mellung pawimawh hi ka phun theih ngei rinna kha ka nei. Hlawhtlinna erawh thilpek a ni bik lo a, hlawhchhuah ngai a ni thung," tiin a sawi.
Djokovic hi a kum tam deuh tawh mah se a la hrisel ṭhain hliam a nei khat a, hlawhtlin châkin a la tuihal reng. Chuvangin, harsatna lian tham tak a tawk a nih ngawt loh chuan tun hnai maiah chuan tennis a chawlhsan a rinawm loh.
Roger Federer nen an inelna a zo tawh a, Nadal nena an inelna pawh a hmawr an bawk hnai. Tunah chuan, Carlos Alcaraz leh Medevedev te hi Djokovic elpui hautak an ni chho dawn, season tharah pawh tennis tihmuhnawmtu a la ni chhunzawm ngei ang.