Germany-in Flick-a an ban

Germany-in Japan an hneh loh zawhah Hansi Flick chungah zahngaihna an lantir lo a, an ban. Kum 1926 aṭang khan Germany-in team coach hna hi an siam ṭan a, Flick hi coach aṭanga ban hmasak ber a ni.

Tun international break thlen hma hian Flick-a hi ban theih dinhmnah a ding tawh a, Japan leh France hi Bayern Munich manager hlui tan fiahna hnuhnunga ngaih a ni. September 9, Inrinni zan khan Germany-in Japan 4-1 ngawtin an hneh lo a, France nena an inkhelh hun pawh an nghak ta lo.

Germany hi match hnuhnung pangaah vawi li an chak lo a, World Cup-a an hneh loh Japan an mualah an hneh lo bawk. August 2021 khan Flick hian Joachim Low a thlak a, match 25 aṭangin vawi 12 an chak.

Flick a chefuh lo

Hansi Flick hian Victoria Bammental leh TSG Hoffenheim te a enkawl hnuah Red Bull Salzburg-ah assistant manager hna a thawk tawh a, Germany-in World Cup nomawi an chawi pawh khan assisant coach a ni.

Khawvela huapa Flick-a'n hming a chherna erawh Bayern Munich a ni a, Niko Kovac hnuaiah asissant manager hna a thawk. Kovac hi an ban avangin Flick hian Bavarians hna enkawl theihna remchang a nei a, a hun ṭha a hlah lo.

Bayern a enkawl chhung rei lo mah se nomawi erawh a chawi tam hman hle. Season khat leh a chanve chhung lekin Bundesliga nomawi pahnih bakah Champions League, DFB Pokal, DFL Supercup, UEFA Super Cup leh FIFA Club World Cup a champion pui vek.

Club chhung boruak a fuh loh avangin Flick hi a chhuak. Euro 2020-ah Germany an chet ṭhat loh avangin Joachim Low a bang a, Flick hian a thlak.

Flick hian Germany a enkawl ṭantirh lamah record a nei ṭha. World Cup qualifier-ah pawh an hmachhawn apiang an sawp emaw tih mai tur a ni. Mahse, kum 2022 a inherchhuah chuan friendly match leh Nations League-ah an che hlei thei lo.

FIFA World Cup 2022 match hmasa berah Japan an hneh lo a, Spain nen an inhnehtawk zui avangin Costa Rica hneh mah se group stage-ah an tla. Flick hian Germany din ṭhar a tum a, World Cup zawh friendly match hmasa berah kumin March 25 khan Peru a hneh a, hei hi chak hmel an hmuh hnuhnun ber a ni ta.

Germany hian match hnuhnung pangaah chak hmel an hmu lo ringawt a ni lo a, vawi li ngawt an chak lo. An indraw chhun pawh an mualah a ni a, Ukraine nen 3-3 ngawtin an inhnehtawk.

Nakkuma khelh tur Euro 2024 hi Germany-in an thleng dawn a, nomawi chawi ngei an tum avangin Flick-a chungah zahngaihna an lantir thei ta lo a ni.

Team enkawltu Voller

Germany-in team enkawl lailawktu atan Rudi Voller an ruat a, a inkhelh hun laia ram tana sulhnu ṭha tak nei Voller hian kum 2000 leh 2004 chhung khan an ram team hi a lo enkawl tawh.

Zanin dar 12:30 hian Germany-in France an mikhual dawn a, Voller hian a enkawl dawn. Kumin February thla khan kum 63 mi Voller hi German national team director atan ruat a ni. Hannes Wolf leh Sandro Wagner ten Voller hi an pui ang.

German FA president Bernd Neuendorf chuan, "Committee-in uluk taka a ngaihtuah hnuah tun hnai result a ṭha tawk loah a ngai a, thil thar a awm a ngaiin a hria. Nakkumah Euro C'ship khelh a nih dawn avangin inrintawkna kan mamawh a, team hian thil thar a mamawh a ni," tiin a sawi.