Nuam lo chungin Messi a zin

Argentina chuan zanin dar 1:30 hian World Cup qualifying khel turin Bolivia an tlawh dawn, an captain Lionel Messi chuan an match hnuhnung bera Ecuador an hneh ṭumin hliam tenau tuar mah se a zin chhuak.a

World champion hian Messi-a freekick hmangin Ecuador 1-0 in an hneh a, qualifying bul ṭan nan an chak. Hun tawp dawnah thlak a ni a, coach Lionel Scaloni chuan a thlak chhan chu Messi duhthlanna a ni tih a sawi.

Inter Miami forward hian Pathianni khan mimal training a nei thei a, match pahnihna pawh hi a khel thei dawn niin a lang. Scaloni chuan, "Leo a zin ve dawn, training a hranpain nei mah se inkhel thei turin a inpeih.

"Ani bakah hian Cuti Romero pawh a dam, chutihrualin an dinhmun dik tak hi inkhelh dawnah kan ngaichang leh ang," a ti a, a player pahnih chu 100% a dam a nih loh chuan chhawr luih kher a tum lo.

Messi hian Argentina tan match 176 aṭangin goal 104 a khung tawh. World Cup qualifier bikah goal 29 a khung tawh - Uruguay international striker Luis Suarez nen an goal khung a inzat. Bolivia lakah Messi-a'n a khung a nih chuan South American zingah World Cup qualifier goal khung hnem ber a ni ang.

South American ram 10 ten World Cup qualifying an khel a, vawi hnih ṭheuh an inkhelh kual hnuah a sang paruk an tling nghal ang - pasarihna chuan Inter confederation playoff an khel dawn thung a ni.