Inpumkhatna match nei dawn

Mamit District Football Association (MDFA) chuan a kum 25 tlin 'Silver Jubilee' pualin September 15, Zirtawpni hian Tripura (Zampui) State nen Laldenga Football Ground, Tuidamah Inpumkhatna Football Match an buatsaih dawn.

Inpumkhata match hi June thla khan MDFA Annual General Body Meeting chuan a lo rel tawh. Match khel tur Tripura Group YMA chuan September thlatir aṭang khan Vanghmun khuaah training an ṭan tawh a, MDFA pawhin Mamit District khaw hrang hrang aṭangin player ṭhate thlangin inbuatsaihna a kalpui.

Mamit District Football Association hian an kum 25-na pualin programme hrang hrang an buatsaih chho zel a, silver jubilee lawmna pual hian kumin September 25 aṭang hian Mamit District Inter-Village Football Tournament an buatsaih dawn bawk.

MDFA Silver Jubilee lawmna pui ber chu October 20 hian Mamit-ah nei tura ruahmanna kalpui a ni.