Lianzuala telna India an tlawm

Damlohna avanga match hmasa zawk a khelh theih loh hnuah Lallianzuala Chhangte chuan Blue Tigers jersey nen khelmual a lut leh ta a, mahse, Lebanon lakah India an chak zo chuang lo a, 1-0 in an tlawm.

Thailand-a khelh mek King's Cup-ah India hian match hmasa zawkah Iraq an hmachhawn a, vawi hnih ngawt hmahruai zawktua an ṭan hnuah Iraq hian penalty hmang ve vein si phurh an sut zo.

Hun pangngaia 2-2 a an inhnehtawk hnuah India hi penalty-ah 5-4 in an tlawm a, Pathianni zan khan Lebanon nen an intawng zui. Mahse, pathumna inchuhna inkhelah India an vanduai nawn a, minute 77-naah Kaseem Al Zein chuan inkhela goal awmchhun a khung - Al Zein hi offside niin lang mah se, referee-in a pawm.

Sunil Chhetri awm loh laia captain armband hrengtu Sandesh Jhingan chuan, "Iraq nena kan inkhelh khan penalty lo turah kan chawi tawh a, Lebanon laka kan goal chhuah pawh offside ngei niin ka hria," a ti.

Damkawr chunga khel Lianzuala chuan, "Khelh ṭhat leh pawh a châkawm zawk hial. Game-ah chuan kan inhnehtawk viauin ka hria a, mahse, shot kan ngah tawk lo. Chutih laiin an ni erawhin an chance neih chhun an chhawr ṭangkai.

"Hun ṭha zawk a inher chhuak leh mai ang," tiin Vanglaini a hrilh a, chak loh a pawm thiam - Lianzuala leh Lalchungnunga telna India squad hian nimin khan Thailand an chhuahsan nghal.