Chetsual hnuah Bagnaia inlan leh nghal

MotoGP rider cham-pionship hmahruaitu Bagnaia chu Pathianni zana tlan zawh tak San Marino Grand Prix-ah a inlan, a chetsual aṭanga ni sarih a liam hnu lekah inelna a hmachhawn leh tihna a ni a, pathumna a ni phak tho.

Italian rider hmaah hian - pakhatna Jorge Martin leh pahnihna Marco Bezzecchi te an thleng a, hnehna changtu ni chiah lo mah se Bagnaia tan chuan dawhsan (podium) lawn phak kha chanchin ṭha tak a ni ngei ang.

Point 36 laia hmahruai mektu Bagnaia chuan, "Hnehna chan kha ka duh em em a, ka tana a ṭhat bakin min ṭantute khan intlansiak hmuhnawm an hmuh chak ang chhawp chhuahsak kha ka tum ber a ni.

"Intlansiak chanve kan zawh kha chuan ka chak zo dawn lo tih ka hrethiam tawh, mahse a tawpa kan dinhmunah erawh ka lawm hle," a ti. Theih ni se la chuan anmahni ramah ngei chak a duh thu a sawi bawk.

Bike intlansiakna sang ber chi Europe aṭangin India ramah an rawn kal dawn. September 24, Pathianni hian Buddh International Circuit-ah Indian Grand Prix an tlan dawn a ni.