Republic of Ireland veltu chu Netherlands

Pathianni zan khan Euro 2024 qualifier-ah Netherlands chuan 2-1 in Republic of Ireland an hneh a, Ireland tan nakkum European football-a ram inelna sang ber khelh beiseina chu a thamral zui, tia sawi theih a ni ta.

Mualneitu Ireland tan Adam Idah (penalty) chuan goal hmahruai khung mah se, Cody Gakpo (penalty) leh Wout Weghorst ten Dutch team tan an khung ve leh a, hun tawp thlenga goal dang lut tawh loin Netherlands an chak.

Netherlands hian match li an khelh aṭangin point kua an nei ta a, chungah match nga aṭanga point 15 neitu France an awm - Ireland erawh match nga aṭanga point thum chauh an neih avangin Euro khelh beiseina la awm mah se, thilmak danglam a thlen tel a ngai tawh.

Group B inkhel dangah Greece chuan 5-0 a Gibraltar sawpin beiseina an nei ve zel a, Netherlands nen an point hmuh zat a inang. Chutihrual chuan Greece hian match khatin an khel tam zawk.

A thlawn mai

Aviva Stadium, Dublin-a inkhelah Republic of Ireland-in an fan-te tan beiseina an siam a, minute lina lekah Netherlands captain Virgil van Dijk handball vangin penalty an hlawh chhuak.

Ireland tan Norwich City striker Adam Idah chuan penalty hi goal-ah a chantir a, mahni muala khel an nih bawk avangin beiseina pawh sang tak an nei - mahse, beisei ang ngawtin thil a kal bik lo.

Minute 19-naah Netherlands-in penalty an hlawh chhuak ve leh thung a, Liverpool forward Cody Gakpo chuan penalty hi inringtawk tak chungin goal-ah a chantir - Ireland an hawihai.

Second half-ah goal khat chiah a lut zui a, a khungtu chu bench aṭanga luhtir Wout Weghorst a ni. Hun tawp thlengin goal dang a lut tawh lo a, Netherlands-in hnehna changin Ireland beiseina a thamral.

A rei ta

Republic of Ireland-in major tournament an khelh lohna a rei ta hle - Euro 2016-ah khan round of 16 lut mah se, Euro 2020-ah an inpetkai zo lo a, nikum World Cup an khelh bawk si loh avangin Ireland football a tlachhe mek, tiin a sawi theih.

Ireland hian World Cup pawh kum 2002 hnuah an khel leh tawh miah lo a, World Cup-a an inlan hnuhnung berah hian round of 16 an lut - hemi hnuah hian Euro bik chu vawi hnih an khel a, mahse, round of 16 chu an thlan san ber a ni.

Tun qualifier-ah Ireland hian match nga khel tawhin vawi khat chiah an la chak a, an hneh awmchhun hi chak la nei ve miah lo Gibraltar an ni a, Gibraltar hi FIFA ranking lamah chuan 198-na an ni mek.

Ireland record a ropui lo takzet tih a lang a, hetihrual hian coach Stephen Kenny chuan ban a nih a inrin loh thu a sawi - "Hnehna kan chang zo lo chu pawi ka ti hle," ti mah se coach nih chhunzawm zel erawh a inring!