Denmark dinhmun a ṭha zel

Euro 2024 qualifier khelh mekah Denmark-in result duhawm an neih chhunzawm zel a, Pathianni zan khan Finland chu 1-0 in an hneh - Slovenia-in 4-0 a San Marino sawp ve bawkin, group H-ah team pahnih hian point 13 ve ve an nei.

Denmark tan Tottenham Hotspur midfielder Pierre-Emile Hojbjerg chuan inkhela goal awmchhun a khung a, minute 86-naa a khung a ni - an hneh tak Finland hi an hnuai chiahah awmin, point 12 an nei mek a, Denmark tan hnehna an chan hi a hlu hle.

Group H-ah hian Kazakhstan chuan point 12 nei bawkin, point 13 neitu Slovenia leh Denmark dinhmun a la him chiang bik lo. Slovenia hian chak la nei lo San Marino chu 4-0 a sawpin, Zan Vipotnik, Jan Mlakar, Sandi Lovric leh Zan Karnicnik te chuan goal khat ṭheuh an khung.

Football ram ṭha tia hriat ni ngai lo Kazakhstan pawhin beiseina an nei zel a, FIFA ranking-a 104-na team hian 1-0 in Northern Ireland an hneh - Maksim Samorodov chuan inkhela goal awmchhun a khung.

Kazakhstan hian Euro 2024 an khel a nih ngat chuan an ram chanchina major tournament an khelh hmasak ber tur a ni dawn a, coach Magomed Adiyev-a'n fak a hlawh khawp ang.