Mitrovic a rintlak reng e

Fulham chhuahsana Saudi Pro League lama pem Aleksandar Mitrovic chuan European league-ah khel tawh lo mah se a la rintlak reng tih a pholang a, Serbia tan hattrick a siam.

Euro 2024 qualifier-ah Serbia hian 3-1 in Lithuania an hneh a, mualneitu Lithuania tan Gytis Paulaukas chuan goal khat khung ve mah se awmzia a nei phak lo.

Mitrovic hian first half chhungin hattrick hi a siam fel der a, ram tan match 83 a khelha goal 55 a khungna a ni - ram tana goal khung hnem ber a nihna record chu goal dangin a pawtsei zel.

Kum 28 mi striker hian tun nipui transfer-ah Fulham aṭangin Saudi club Al Hilal a zawm a, match thumah goal li a khung leh der tawh bawk. He club-ah hian ram tana a khelhpui midfielder Sergej Milinkovic-Savic te nen an khel ho.

Serbia hian match nga an khelhah point 10 an hmuhna chiah a ni a, an chungah match lia point neitu Hungary awmin hma an hruai mek - pathumna Montenegro-in match ngaah point riat an neih avangin Serbia hi an la him bik lo.