SAFF Under-16 champion India

South Asian Football Federation (SAFF) Under-16 championship-ah India an champion a, Indian naupang rualte hian final-ah Bangladesh chu 2-0 in an hneh a ni.

Changlimithang Stadium, Thimphu, Bhutan-a inkhelah India tan Bharat Lairenjam leh Levis Zangminlun ten goal khat ve ve an khung a, Bangladeh lamin a chhanletna tur an neih loh avangin an tlawm.

India hian group stage-ah pawh Bangladesh hi 1-0 in an lo hneh tawh a, final-ah hneh nawn lehin, nomawi nen Indian footballer naupang rualte an lo haw a ni.

SAFF U16-ah hian ram paruk inelin, India, Nepal leh Bangladesh chu group A-ah an awm a, group B-ah Bhutan, Maldives leh Pakistan an awm ve leh thung - an inkhelh kual hnuah group pahniha a sang pahnihin semifinal an lut.

India hian Bangladesh (1-0) leh Nepal (1-0) an hneh hnuin, semifinal an lut a, semifinal-ah hian Maldives chu 8-0 ngawtin an sawp thei - final-ah harsatna lian tham tawk loin, a vawi nga nan India U16 an champion.

SAFF U16 champion squad-ah hian Mizo player an awm lo.