Manipur ngamtu Mizoram an champion

Sub Junior Boys' National Football Championship 2023-24-ah Mizoram chuan Manipur 3-0 a hnehin an champion. Final-a Mizoram tana goal khungtute hi Lalruatdika, Henry Lalhnehzova leh Isak Lalmalsawma te an ni.

Mizoram hi champion thiam bik coach HC Zarzoliana'n a kaihruai a, final-a an sawp hi football-a Mizoram elpui ber pakhat Manipur a nih bawk avangin champion nomawi hi a hlu hle. Goal hmahruai khungtu leh goal hnih dang siamsaktu Sialhawk naupang Didika chu final bika man of the match-ah an thlang.

Mizo naupang an thiam

Behrampore Stadium, West Bengal-ah NorthEast Derby khelh a ni a, Mizoram leh Manipur a nih avangin boruak a ṭang. Mahse, khelmualah erawh Mizo naupangten an thiamzia pholangin Manipur lakah an chungnung hle.

Minute thumna lekah Sialhawk naupang Didika chuan mawi zetin Manipur keeper ban phak loin a pet lut a, goal luh theih nan Mizoramin pressure an pe ṭha. Didika finishing tawih tluk zetin ball petu Malsawmkima thawhrimna a hlu.

Mizoramin first half-ah goal an khung belh thei lo a, minute 52-naah Odisha laka hattrick siamtu Henry Lalhnehzova'n a khung belh. Muakhang naupang Henry hian Didika leh Phuldungsei naupang Lalrempuia te thawhrah sengin box vei lam aṭangin kawh zetin a pet goal.

Goal hnih luh hnuah Mizoramin chance ṭhahnem tak an insiam a, goal hmaah an vannei tawk lo. Minute 72-naah Isak Lalmalsawma a vannei ta a, Didika hnen aṭanga a ball hmuh chu Sihphir naupang Isak hian lalutin chiang zetin a pet lut. Inkhelh thiam zawk leh minute 90 chhunga chungnung zawk Mizoram 3-0 in an chak.

Coach hlawhtling Zara

Mizoram coach HC Zarzoliana chuan, "Kan nauten theihtawp an chhuah a, an taima. Anmahni hrual ṭhintu coach Sir Mamawia leh anmahni enkawltu SYS chungah kan lawm. Team thawhhona a ṭha a, coaching staff leh player-te thawh hona a ṭha em em bawk. Pathian min awmpuina vang a ni a, Mizoram lam aṭanga min ṭawngṭaipuitute leh min thlawptute chungah kan lawm takzet a ni, " tiin Vanglaini a hrilh.

Behrampore-ah hian Kolkata aṭangin MFA hruaitu hlui Lalbiakzuala'n Mizoram team hi a ṭawiawm a, an zinna tur vel a buaipuisak bawk. BZ-a hi Mizoramin Santosh Trophy an champion ṭuma manager kha a ni a, coach Zara te nen hian an thawk ho.

Ramhlun South mi Zara hian football-ah sulhnu a nei ṭha. Mizoram hi Subroto Under 14, National Sub Junior (vawi 2), Santosh Trophy, Dr T Aoa Football (vawi 2), North East Games (vawi 2), North East Olympic leh Khelo India Under 18-ah te team enkawltu nichungin nomawi a chawi tawh. Tualchhung football-ah nomawi chawi theih ang zawng zawng a chawi vek tawha ngaih theih a ni bawk.

SYS hnathawh a hlu

Mizoram champion-na kawngah Sports & Youth Services an pawimawh a, tuna naupangte hi SYS enkawl Regional Sports Training Centre, Saidan-a awmte an ni. Mizo coach tawnhriat nei ṭha Lalthawmmawia'n (Mamawia) kum khat chhung a enkawl tawhte an ni.

SYS coach Mamawia chuan, "Nikum Subroto Cup kan khelh hma thla khat chauh a awm tawh khan tuna batch-te hi kan la khawm a, Sialhawk naupang Didika hi kan lak belh. Tun ṭuma an hlawhtlinaah hian ka lawm a, MFA leh SYS thawhdunnain rah ṭha a thlen a ni," tiin Vanglaini a hrilh.