MPL10 - Hnuai leng inlan hun

Project Veng khingpui tur Chhinga Veng

Zote Toyota MPL10 round 5 chu vawiin hian khelh a ni dawn a, match hnih awm tura inlan tur team palite hi table hnuai lama awm an ni. Chawhma dar 11:00 hian 1st Bn MAP Ground-ah Project Veng FC leh Chhinga Veng FC te an inkhel ang.

I Day Football champion Chhingcows hi MPL10-ah pawh champion rinkai an ni pha a, chutihrualin an elpui Chanmari FC an hneh loh bakah match hmasa bera Mizoram Police laka point an hmuh loh avangin a sang pali zingah an awm rih lo.

Chhinga Veng hi hliam vangin an buai mek. Tlarhnungah centre back pahnih Abel Lalruatfela leh H. Malsawmdawngkima bakah wing pahnih C. Lalhunruata leh leh K. Lalruatdika (Teka) te hliamin a tlak buak. Captain MS Dawngliana chu hrem vangin a la khel thei dawn lo a, striker MC Malsawmzuala pawh Siaha lamah a haw avangin Project Veng a hmachhawn thei lo.

Chhingcows coach Lalsangzuala Hmar chuan, "Tlarhnung chu kan phuahchawp deuh a ngai dawn. Mahse, squad-ah player 20 chuang kan nei a, kan chhawr theih chin aṭanga ṭha ber thlan chhuah kan tum ang," tiin Vanglaini a hrilh.

Project Veng coach R. Lalrammawia (Patea) chuan, "Keini tan chuan thil thar a ni a, inzirna tur kan ngah hle. Chutihrualin kan khelh tawh chinah Kolasib player-ten MPL khelh an tlin tih kan hmu a, insiamṭhat hret hret erawh kan mamawh. Kan dinhmun kan thlir a, point hmuh hrim hrim hi kan tum a ni," tiin a sawi a, Chhingcows laka point hmuh an tum thu a sawi.

Kolasib club hian an match hnuhnung berah Electric Veng an hneh lo a, hun tawp dawna an chetsual vang a ni. Hemi hma hian Mizoram Police lakah Project Veng hian point khat an hlawh chhuak a, an vanneih ṭum ni se chak thei dinhmunah an ding. Coach Patea hote hi an fitness an ṭha a, Chhingcows tan buaina tham an ni ang.

Venghnuai hmaah Electric Veng fiahna

Zote Toyota MPL10-ah vawiin chawhnu dar 2:00 hian FC Venghnuai leh Electric Veng FC te an inkhel dawn a, intum tawk tura ngaih an ni. Venghnuai hian chak hmel an la hmu lo a, Electric Veng hi hun ṭhaah a ngaih theih.

Mahse, MPL9 finalist Venghnuai hian tlarhnung tihphui an harsat leh ṭhin. An match hnuhnung bera Chhinga Veng an hneh loh ṭum pawhin goalkeeper tihsual vang leh offside trap siam fuh loh vangin goal hnih an chhuah. Coach K. Lalthlamuana chuan, "Semifinal khelh kan tum a nih chuan chak kan mamawh a, chumi tur chuan theihtawp kan chhuah a ṭul a ni," tiin Vanglaini a hrilh.

Chutihrualin Electric Veng hi dah hniam an thiang lo a, match hnuhnung bera Project Veng an hneh avangin point li an hmu tawh. An chak zawn a nih phei chuan palinaa awm Mizoram Police nen an point hmuh zat a inang dawn. Player naupang tha za rual awm khawmna Electric Veng hian MPL kalphung an man chho ṭan a, I Day Football leh tun khaikhin chuan an puitling tawh hle. EFC tan Venghnuai hi fiahna ṭha tak a ni thei ang.