India-in Pakistan an sawp

Asia Cup Super 4-ah India chuan R. Premadasa Stadium, Colombo-ah Pakistan chu 228 runs-in an sawp. ODI match ni mah se ruahsur vangin ni hnih khelh a ni a, Men in Blue lakah Shaheens an zawr.

Pakistan-in vawm hmasak an thlang a, India batter-ten an thiam thil phochhuahna hunah an hmang. Top order-ten first match-a an chet chhiat an dah ṭha a, bul ṭantu Rohit Sharma (56) leh Shubman Gill (58) bakah Virat Kohli (122*) leh KL Rahul (111*) te an che ṭha em em vek.

Kohli-a'n ṭum dang ang thoin Pakistan a rawn ngam leh a, thi loa 122 runs a siam vangin man of the match-ah an thlang. India hian 356/2 runs an siam a, Pakistan laka run an siam tam ber ṭum kum 2005-a mi chu an nihrual. April 5, 2005 khan India hian Vizag-ah 356/9 runs an siam a, MS Dhoni-a'n 148 runs a siam a ni.

Pakistan bat hun a thleng a, captain Babar Azam-a'n run 10 bak a siam lo a, batter dang an che ṭhat loh bawk avangin over 32 lekah 128 runs lek siamin an thi fai vek. Kuldeep Yadav-a'n wicket nga a la a, 25 runs chauh a pe.