Sakhming chul lo tur Novak Djokovic

Grand Slam champion hnem ber a ni zo chauh a, a chanchin kan hriat thar leh ber chu world number 1 a nih thu a ni. Tennis hi khawvela khelh a nih chhung chuan Serbian star hi a hming an dai ngai tawh lo ang - ṭhangtharte pawhin a hming hi an la lam zel dawn.

Tun kar nena chhiar telin Djokovic hi chawlhkar 390 chhung chu world number 1 a ni dawn ta a, ani aia number 1 dinhmun chelh rei thei an awm lo, record dinglai chelhtu a nihna chu a sawhnghet zual.

World number 1 nih rei lamah chuan - Djokovic hnungah hian Steffi Graf (377 weeks), Martina Navratilova (332) leh Serena Williams (319) te an awm a, legend Roger Federer chu chawlhkar 310 chhung number 1 a ni bawk.

Kir lehna

US Open 2022 an khelh zawh khan champion Carlos Alcaraz chuan world number 1 dinhmun a luah, mahse Spanish star hi hliam vangin thla li chhung a inkhel mumal thei lo - a sang berah Djokovic a lo kir leh a ni.

Tun season an hmang chho a, player ṭha pahnih Alcaraz leh Djokovic te hi a chung berah an inawm chhawk zak zak. US Open khelh hma thleng kha chuan a kum naupang zawk Alcaraz chu a chungnung zawk.

Mahse, season hmasa khan Djokovic-a'n US Open a khel lo a, champion lai Alcaraz erawhin a ranking point 2000 humhim tura a beih a ngai thung. New York khawpuia match khat a chak lek pawh kha Djokovic tan number 1 nih nan a tawk a ni.

US Open semifinal-ah Alcaraz hian Daniil Medvedev a hneh lo a, a elpui Djokovic erawhin Russian tlangval hi lo hnehin a vawi 24 nan Grand Slam nomawi a chawi hial a, ranking sang bera awm leh champion nih a inhmeh hle.

Djokovic an dah sang

A kum tam deuh tawh mah se Djokovic a la ṭha reng a, player naupang zawkte pawhin kum 36 mi hi thahrui ngah leh match khelh rei theih lamah an la tluk meuh lo, tennis roreltu a la ni zel dawn ni pawhin a lang.

Andy Murray chuan a elpui ni ṭhin chungchang sawiin, "Player naupang zawkin hian theihna an nei, chutihrualin Novak khum hi thil harsa tak a la ni dawn. Roger Federer leh Rafael Nadal te angin hun rei tak chhung ṭha takin a khel thei tih kan hmu.

"Tuna a lan dan chuan Novak hi a chhe thut dawn lo, chuvangin tennis khawvel hi a la awp rih dawn ni pawhin a lang. A taksa a hrisel ṭha a, a rilru puthmang a dik bawk," tiin a sawi a, major title lak belh zel turin duhsakna a hlan bawk.

Britain tlangval Murray leh Djokovic te hi an lo inhmachhawn fo tawh - Murray pawh hi player ṭha leh theihna nei sang a ni a, major title pathum bakah Olympic gold medal a la, mahse a khel bawr hliam vangin kum 30 a pelh hnu lawkah a tlahniam ta vek a ni.

Alcaraz dinhmun

Carlos Alcaraz-a'n US Open nomawi a kawl lai a humhim thei lo a, world number 1 a nihna a hloh bawk. Spanish tlangval hian tunah chuan chawlh hahdam rih an tum, ram tana Davis Cup khel tura tih ni mah se a inhnukdawk leh ta zawk.

Ram leh ram tennis hmanga inelna Davis Cup Finals hi September 12-17 chhunga khelh tur a ni. Spanish Tennis Federation chuan Alcaraz a inhnuhdawh thu leh, a hmunruakah Albert Ramos a inlan tur thu an tichiang nghal a ni.

Spain tan hian Alejandro Davidovich Fokina, Roberto Bautista Agut, Marcel Granollers leh Albert Ramos-Vinolas te an inlan dawn. Djokovic awmna ram Serbia, Czech Republic leh South Korea te nen an inhmachhawn ang.

Alcaraz chauh hi inhnukdawk a ni lo. Italian tlangval Jannik Sinner leh Matteo Berrettini te pawh an ram squad aṭangin an inhnukdawk ve bawk. Mimal inelna tournament an khel hnem a, hun an neih tlem avangin player tan inlan vek a harsa.