Everton an hralh hnai

Premier League club talbuai Everton chu American investment firm 777 Partners chuan an lei dawn a, he thuziak i chhiar meuh chuan an indawr fel tawh hial mai thei.

Merseyside club hian a tirah American firm tho MSP Sports Capital chu inbiakna an neihpui a, mahse, an inrem theih loh hnuah 777 Partners nen an inbe zui a, neitu thar an nei dawn ta.

Everton hi kum 2016 khan Farhad Moshiri chuan leiin, hma pawh a la nasa hle. British-Iranian sumdawng hausa hian Merseyside club hi siam len tumin pound maktaduai 750 zet a seng tawh a, mahse, club a enkawl danah fan-te an lawm lo.

Tun hnai season hnihah Championship lama relegate thei dinhmunah an ding hman a, fan-ten Moshiri leh club board te chu an club chhuahsan turin an ngen hial.

Toffees (Everton sawina) chief executive Denise Barrett-Baxendale, chief finance & strategy officer Grant Ingles leh non-executive director Graeme Sharp te chuan club hi an chhuahsan phah hial a, chairman Bill Kenwright erawh a cham chhunzawm.

March thla khan Everton hian a zawna kum nga nan sum an hloh thu an tarlang a, hetih chhunga an sum hloh zat hi pound maktaduai 430 a tling hial. Hetihrual hian stadium thar tur an ruahman mek bawk a, £760mtd vel seng turah an inngai.

777 Partners hi infiamna lamah an inhmang nasa hle. Brazilian club Vasco de Gama, Belgian club lar Standard Liege leh German second division club Hertha Berlin-ah te share neiin, mahse, fan-ten an duh lohna an lantir nasa viau ṭhin.

Kum 2021 khan British Basketball League-ah 45% stake an lei a, he league club zinga mi London Lions neitu an ni bawk. La Liga club Sevilla-ah pawh share an nei a, Everton hi an lei chuan Premier League club 20 zinga 10 chu American sumdawng hausa ta a ni dawn, tihna a ni.