Pogba an hrem lailawk

Juventus midfielder Paul Pogba chu damdawi hman phal loh a hmang tih hmuhchhuah a ni a, hei vang hian inkhel thei lo tura hrem lailawk a ni a, dan a bawhchhe ngei a nih chuan hremna na zawk hmachhawn thei dinhmunah a ding.

August 21 khan Juventus chuan Serie A match khelin Udinese an lenchilh a, he inkhelah hian Old Lady chu 3-0 in an chak. Juve tan Pogba hi a inlan lo, substitute bench lamah a ṭhu tluan.

Mahse, team zinga mi a nih avangin endikna erawh a hmachhawn a ngai tho. Dan hi a bawhchhia a nih chuan kum hnih aṭanga kum li thleng inkhel thei lo tura hrem thei a ni dawn, kum 30 mi a nih tawh avangin a football zinkawng a tawi phah thei dawn hle.

Juventus chuan thu-chhuah siamin, "Juventus Football Club chuan 11 September, 2023 hian Paul Labile Pogba chu kan hrem lailawk tih kan puang. National Anti-Doping Tribunal lamin kumin August 20 khan an endik a, hetah hian dan a bawhchhia nia an sawi vang a ni," an ti.

Pogba agent Rafaela Pimenta-i chuan, "Paul Pogba hian dan kalha thil tih a duh ngai lo, endik vawi hnihna neih leh a ni a, a result a lo chhuah hma chuan engmah ka sawi thei lo," a ti.

Manchester United tana contract a hman zawh hnuah Juventus hian nukum July thla khan Pogba hi an la let a, kum li daih contract an ziahpui. Turin khawpuia a kir leh chinah ṭha pangngai taka hun hman a la nei meuh lo a ni ber.

Hliam vangin a buai ngun hle, season hmasa khan Serie A-ah minute 108 chauh a inlan, inelna dang nena belhkhawm pawhin minute 162 bak a inkhel lo - a inkhelh tlem em avangin France tana Qatar World Cup khel zingah pawh a tel phak lo hial.

Tun season kal laiah pawh minute 51 chauh a la inkhel. Empoli nen an inkhelh ṭumin hliam tenau a tuar leh tawh a, coach Massimo Allegri tan pawh chhawr hman a ni meuh lo, tunah chuan harsatna nasa zawk hmachhawn thei dinhmunah a ding leh ta a ni.