WIN-DIA

Silly Point hnuhnung bera kan lo thailan chu tisaah lo changin, zawlnei ianga hawi uan ka nuam e. Super 4 inkhel tura kan ngaih erawh a pha ta chiah lo - High Sikul leh Primary Sikul naupang inchhaih ang lekah a thamram thung lawi si! Hindustan tan lawmna ni, Pakistan tan hun theihngilhtlak mai a chang ta si a nih hi maw!

Rain Rain Go Away

Tun ang South West Monsoon (Zofaten a sakhminga "fur" kan vuah) chawhnu lamah chuan Sri Lanka hi ruahtui tamna hmun a ni ṭhin. Zep thu a cheng lo Asia Cricket Council pawhin hei aia ruahmanna fel hi, a thlengtu branch chungchangah chuan a siam thei ngei ang? Tun kar inkhel awm chho tur thleng hian a nghawng chho zel dawn te pawh a ang.

Inkhel

Ziah lawk ang ngeiin, ṭhumvawra chak Pakistan kaptan Babar Azam-a'n vawm hmasak a thlang ngei a, mahse thumvawra a vanneih avanga a hlim hmel bak hi he inkhelh chhung hian Babar Azam a hmel êng hmuh zui tur a awm tawh meuh lo.

India opener pahnih - kaptan Rohit Sharma leh Shubman Gill ten half century an siam ve ve a, an hnunga rawn zui Virat Kohli leh KL Rahul te century ve ve an siam dun veleh bawk a, Pakistan ball vawm thiam mi te tan tlai lungngaithlak ṭum hnih an hmang a ni ber.

Indian batsman-te sapatal laka chhanna leh doletna tur an vai a ni ber mai awm e. Chutah, pem na tak chunga chi phul sak ni awm ang ziazangin, ball vawm kawh Harish Rauf chu a pang khinglam na vangin inkhelh laklawh laiin lakchhuah a ni a, tun Asia Cup ah hian a inlan tawh kher lo ang. Naseem Shah lah fielding laia bai chhuakin, inkhelh a chhunzawm zui thei lo. Indian batsman ten Advance Krismas an hmang a ni ber mai awm e.

Kan sawi ang chiah

Virat Kohli-a'n Silly Point column hi a lo chhiar ngat se chuan Vanglaini chungah lawmthu sawi a ba ngei ang. India kaptan hlui Kohli hi a ngawi rei ta deuh a, mahse stage sangah mi danglam bik an nihna an pholang ṭhin tia kan lo thailan chu a takin a rawn chantir.

Talent nei ṭha bik Kohli chuan ODI century vawi 47-na a siam mai bakah run 13,000 vawk chhuak rang ber record rawn siamin, a ngaihsan em em Sachin Tendulkar a record a rawn khum ta a ni.

Chan lo khanah malsawmna

Infiamna khawvelah hian thawnthu (script) awmsa awm ve hek suh, a ṭha zawng leh chhe zawnga beisei miah lo a thil rawn inher thut thut hi a kentel hi a ni ve hrim hrim. A malpui hliam avanga zaipui a tawh aṭanga thla ruk hnuah KL Rahul chu khelmual chhunga a rawn inlan lehna a ni a, a hun ṭha neih chu kut khing hnihna lo vuan chatin, century nen International cricket a lam ang a rawn let lehna a lawm a ni.

KL-a hi inkhel tura beisei pawh a la ni lo a, Shreyas Iyer-a'n warm up laia a kawng a tihnat thut avanga playing 11 a last minute a ziahluh a ni. KL-a ang bawk kumin chho a a kawng leh hnungzang na vanga buai Shreyas Iyer a fitness-in zawhna a tih tam phah a, World Cup squad pawh ennawn a ṭul phah hial ang.

Pakistan te lek lek

Bharat mipui vaibelchhe chuangin an hmuh châk Jasprit Bumrah-a'n fitness test a paltlang kan ti thei ang. Nation Cricket Academy lama kum khat dawn a hliam a inenkawl chhung khan trick thar a lo zir belh tih kan hmu thei a, lehlam lehlam zawngin ball a vawm che thei ta tlat mai.

Sawi lawk ang ngeiin Premadasa Khelmual Pitch hian spinner te a pui ṭhin a, kan hma lawk World Cup lo awm turah hian India Spin Bowling Department hnar kaitu ber tur chu Kuldeep Yadav a ni tih nemnghet turin wicket nga a rawn la a, hmakhawsang aṭanga Spinner chai thiama khawvel hriat Pakistan batsman-ten 'alien' an hmachhawn ta thut emaw tih mai turin a rawn vawm ṭhuai kual vel a ni ber e.

Tlipna

Asia Cup champion turin Bharat Team te hi rinkai ber an ni a, a hnu chawlkar thum hnua ṭan mai tur, mahni rama khelh tur World Cup-ah hian Rohit Sharma leh a hote hian, he hnehna hlado hi an pu tlang zel thei dawn nge he Asia Cup ah pawh hian an irhfiak leh thut dawn? i lo thlir zel ang!