Goal kua khungtu Portugal an chak chiang
Euro 2024 qualifier khelh mekah Portugal-in hneh loh an la tawng lo - Thawhṭanni zan khan Luxembourg mikhualin, 9-0 ngawtin an sawp a, Cristiano Ronaldo a tel lo mah mah!
Portugal tan hrem vangin an thiampuipa Ronaldo inlan lo mah se buai phahna a tling lo - Goncalo Inacio, Goncalo Ramos leh Diogo Jota ten goal hnih ṭheuh an khung a, Ricardo Horta, Bruno Fernandes leh João Félix ten vawi khat ṭheuh an khung bawk.
Manchester United captain Bruno hian assist hattrick a siam bawk a, Portugal an chak chiang hle - match ruk an khelh tawhah la chak vekin, Euro 2024 inpetkai turin hmabak a ko ta lo hle.
A surin a sur!
FIFA ranking-ah 89-na daih ni mah se Luxembourg-in tun qualifier-ah an tichhe hran lo - Portugal an hmachhawn hma hian qualifier match ngaah vawi thum an chak thei a, goal 16 an khung bawk.
Luxembourg hneh zingah Liechtenstein, Bosnia & Herzegovina leh Iceland te an awm a, an player zingah Borussia M'Gladbach forward Borges Sanches, Spartak Moscow midfielder Christopher Martins, Mainz 05 midfielder Leandro Barreiro te ho an awm bawk avangin an inringtawk hle.
Mahse, an lenluhna hi Portugal khelmual a ni miau a, an tan a awlsam lo - minute 12-na lekah Sporting Lisbon defender Inacio chuan goal hmahruai a khung a, minute 18-naah Gonçalo Ramos chuan a belhchhah zui - player pahnih hian first half chhungin goal khat an thawh belh leh ve ve a, 4-0 in chawlhlawk an hmang.
A la tawk lo
Portugal hian second half-ah pawh chawlh an tum chuang lo. Liverpool forward Jota chuan goal hnih rawn khungin, Horta, Fernandes leh Felix te pawhin an khung ve leh a, dawl zawrin Luxembourg an zawr.
World Cup 2022 quarterfinal-ah Portugal hian Morocco ngam loin, coach Fernando Santos a bang zui - a aiah Belgium boss hlui Roberto Martinez an la lut a, qualifier match ruk an khelhah match ruk chakin, goal 24 zet an khung a, an lamah a la lut ve miah lo thung!
October international break-ah an mikhual Slovakia an hneh a, Luxembourg-in khualmuala Iceland an hneh loh chuan Portugal hian match thum khelh tur la nei chungin Euro 2024 an inpetkai ang.