Asian Games khel tur India an buai

September 19-ah Indian football team chuan Asian Games-a an match hmasa ber an khel tawh dawn a, mahse, he thu buatsaih a nih thleng hian India hi an squad hruai turah an la chiang lo!

Asian Games khel tur hian All India Football Federation chuan player 22 hming a puang tawh a, squad hi Under-23 tura tih niin, senior player pathum telh theih a ni bawk.

Mahse, Asian Games hi FIFA calendar-ah a tel loh avangin, club-te chu an player-te Games khel tura chhuahtir ngei tura thupek theih an ni lo a, Indian Super League club tam zawkte chuan an player-te chhuahtir an phal lo.

Senior player koh pathum, Bengaluru FC striker Sunil Chhetri, FC Goa defender Sandesh Jhingan leh Bengaluru goalkeeper Gurpreet Singh Sandhu te pawh an club khelhnaten chhuah an phal lo nia sawi a ni.

Hei vang hian AIFF chuan ruahmanna thar siamin, ISL club-te chu player pahnih ṭheuh chhuah turin an ngen. Mahse, inkhelh hun a hnai tawh a, player thar an ko a nih chuan India hian Olympic Council of Asia (OCA) lamah dilna an thlen leh a ṭul dawn.

Ruahman dan chuan September 16-ah India team hi zin chhuak tur an ni tawh a, AIIF, Sports Authority of India (SAI) leh Indian Olympic Association (IOA) ten player thar ziak lut turin ni tam an nei tawh lo.

ISL club lamin harsatna an siam avang hian Indian team hi tirh leh loh mai tur angin sawi a awm hman hial a, mahse, a mualpho thlak dawna an hriat avangin team tirh loh tawp chu a fuh loah an ngai.

India U23 team hi Clifford Miranda chuan a kalpui dawn a, senior team coach Igor Stimac chuan player thar 22 hi a thlir ang a, anni hi a pawm thei a nih chuan Croatian coach hian a kaihruai thung ang.

Asian Games 2023 khel tur squad-ah hian East Bengal defender Lalchungnunga chu Mizo player awmchhun a ni a, mahse, Durtlang tlangval hian club lamin chhuah an phal loh thu Vanglaini a hrilh.