Chak mamawh Wales an chak

Euro 2024 qualifier-ah match hnih a zawna an chak loh hnuah Wales an chak ve leh ta a, an mikhualna ramah Latvia chu 2-0 in an hneh - match nga aṭanga point sarih neiin Euro 2024 khelh beiseina a nung thar ve leh ta.

Wales hian minute 29-naah Fulham winger Harry Wilson hmangin penalty an hlawh chhuak a, captain Aaron Ramsey chuan harsatna nei loin goal-ah a chantir - hun pek belhah David Brooks chuan a khung belhchhah leh bawk.

Robert Page-a naute tan lawm erawh a kim lo - goal hmaah an hriam tawk lo a, FIFA ranking-a 134-na team lakah goal hmahruai khung turin penalty an mamawh a, chak nemnghehna injury time-ah an khung thei hram.

Wales tan keeper Danny Ward a che ṭha a, Leicester City keeper hian Janis Ikaunieks leh Raimonds Krollis khung ngei tur nia lang chu a dansak a, tun qualifier-a la chak miah lo team lakah Wales an mualpho teuh hle.

Group D-ah hian 1-0 a Armenia hnehtu Croatia chuan hma an hruai mek a, Thawhṭanni zan inkhel dangah Andrej Kramaric goal hmangin Croatia hi an chak.

Croatia hian match li khelh tawhah point 10 an nei mek a, pahnihna Turkey nen an point hmuh zat inangin, match khatin an khel tlem thung - Armenia leh Wales ten match nga ve ve khel tawhin, point sarih ve ve an nei a, point la nei lo Latvia tan beisei tur a awm tawh lo thung.