Mizoramin medal panga la

National Senior Taekwondo Cham-pionship vawi 39-na leh National Poomsae Championahip vawi 16-na khelh zawh takah Mizoram team chuan gold medal pakhat bakah silver leh bronze medal pahnih ve ve an la.

Gold medal latute hi mipa poomsae under 30 team inelnaah niin - Lalthlamuanpuia, Daniel Lalhumthanga leh H.Vanlalfela te ṭang hoin an lak a ni a. National champion tur hian state 35 leh central service paruk te an paltlang a. Anmahni hnaih bertu Services (SSCB) hian point 7.05 an hmuh laiin Mizoram team hian point 7.16 an hmu thung a, a vawi thum nan India champion an ni.

Silver medal hi poomsae under 30 pair-ah leh female over 30 team-a lak niin, under 30 pair hi Daniel Lalhumthanga leh Vanlalhmangaihzuali te ṭang dun lak a ni. Final-ah Arunachal Pradesh pair nen point 6.05 ve ve hmuin an in draw a, deciding-a presentation-ah Arunchal hi an vannei ta zawk.

Silver medal pakhat zawk hi hmeichhe inelna poomsae over 30-ah niin Doris Lalhmangaihzuali, Lalsangzuali leh Teresa Lalhruaitluangi te ṭang ho an ni. Gold medal inchuhna inkhelah SSB an ngam lo. Individual poomsae-ah champion lai Lalthlamuanpuia chuan bronze a la bawk a ni.

Senior National Championshipa medal an lak avang hian, November thlaa Goa-a neih tur National Games atan Mizoram team chu category 6-ah chuan a tling chiang ta a ni.

National Taekwondo Championship-ah hian state/UT 35 bakah central service paruk an tel a. Mizoram team-te hi kyorugi player 10 leh poomsae player 12 an kal a ni.