A chung berah Sabalenka

Hmeichhe tennis thuneitu sang Women's Tennis Association (WTA) chuan ranking thar a ti chhuak a, hun rei tak chhung number 1 lo ni tawh Iga Swiatek chu pahnihnaah tlahniamin, a chung berah Aryna Sabalenka a rawn ding chhuak.

Polish nula Swiatek hian US Open nomawi a kawl lai a hum thei lo, fourth round-ah Jelena Ostapenko hneh loin a zinkawng a tawp. Ashleigh Barty chawlh hnu, nikum March 23 aṭang khan Swiatek hi number 1 a ni ngar ngar, tunah chuan a tlahniam ve ta a ni.

WTA ranking an siam chinah Sabalenka hi number 1 ni thei player 29-na a ni ta chiah a, tun season kal laiah Australian Open nomawi a chawi bakah Wimbledon leh leh French Open semifinal a thleng a, inelna neih zawk tak US Open-ah champion lo mah se final a lut bawk.

US Open champion Coco Gauff chu pathumna a ni a, kum 19 mi hian a ranking san ber ṭum a tawng. Serena Williams hnua US Open champion ni leh thei naupang ber hian a hmaa player awm pathum a kalpel a ni.