Goal nena pianchamphaphak lawmtu Hriata

Zote Toyota MPL10-ah Electric Veng a zawnin an chak. EFC hian Project Veng an hneh hnuah nimin khan FC Venghnuai 3-1 in an hneh a, table-ah panganaah an awm chho. Captain C. Lalhriatpuia'n a pianchamphaphak lawm nan goal hnih a khung a, man of the match-a thlan a nih bakah Electric Veng a chakpui bawk.

1st Bn MAP Ground-a inkhelah Venghnuaiin bul an ṭan ṭha a, goal chance pawh an ngah. Amaherawhchu, C. Ngurnuntluanga leh Jerry Lalchhanchhuaha te goal hmaah an vannei tawk lo a, Electric Veng striker C. Hriata erawhin hun ṭha a hlah lo - goal ṭha pahnih a khung.

Jerry hmangin Venghnuaiin siphurh sut ṭhen mah se injury time-ah Lalbuatsaiha'n Electric Veng chak nemnghehna goal a khung. MPL9 finalist Venghnuai hi table mawngphahah an awm a, Electric Veng erawh panganaah an insawn chho thung.