Project Veng lakah Chhinga Veng vannei

Nimin khan Zote Toyota MPL10-ah Project Veng leh Chhinga Veng te 1-1 in an inhnehtawk a, I Day Football champion Chhingcows chu team vannei zawk an ni.

1st Bn MAP Ground-a inkhelah Lalkrawsmawia hmangin Project Vengin an khung hmasa a, Chhingcows-in Lalnunzira hmangin an sut. Kolasib club-in an khuaa round 6 khelh hmain Lalsangzula Hmar enkawl Chhingcows lakah point hlu tak an hlawh chhuak a, an phur phah sawt ang.

Project Vengin MPL club dangte an elpha tih an pholang a, I Day Football champion lakah chak thei dinhmunah an ding. Sihtlangpui tlangval Mawitea hmanga goal an khung hnuah hnai tak aṭangin goal zawnah a tauh a, Zonunmawia'n goalline aṭangin a tauh chhuak.

Hun tawp lamah Project Veng winger Lalfamkima'n crossbar a pet per a, FK-a hian keeper RS Lallawmzuala ball thlauh chu a hrem thei lo. Jack Lianlalmawi Neihsial pawhin goal-ah ṭha takin pet mah se keeper Lawma'n ṭha takin a dansak.

Chhinga Veng hi an bet reng bik lo a, goal an chhuah hma hian ṭum thum vel zet chance ṭha an insiam hman. Isac Zomuanpuia chu mual dinglamah a hmuhnawm a, goal erawh I Day Football best player Zirtea ke aṭanga chhuak a ni. Republic Veng tlangval hian box pawn aṭangin kawh zetin a pet goal.

Chhingcows coach Lalsangzuala Hmar chuan, "Tuna kan khelh dan anga kan khelh zel chuan kan ropui lo khawp ang. Insiamṭhat kan mamawh a ni," tiin Vanglaini a hrilh. Project assistant coach Lalruatfela chuan, "Vanneih ṭum chu ni se chak thei kan ni a, chutihrualin Chhinga Veng ṭhatzia kan hria. Point khat hmuh theih pawh hi a lawmawm viau a ni," tiin Vanglaini a hrilh ve bawk.