Voller-a'n Germany a chakpui

Germany national team-in an coach Hansi Flick an ban aṭanga ni hnih hnuah Rudi Voller hoin France 2-1 in an hneh. Signal Iduna Park-a inkhelah mualneitu tan Thomas Muller leh Leroy Sane ten an khung a, Les Blues tan Antoine Griezmann-a'n penalty aṭangin siphurh a sut ṭhen.

Euro 2024 thlengtu tur Germany hian match thum chhung an chak lo zawn tawh a, Voller hnuaiah kum 34 mi Muller-a'n bul ṭan tirin bench-ah Joshua Kimmich a awm. France pawhin Kylian Mbappe chu bench-ah an dah ve bawk.

Minute lina lekah Benjamin Henrichs cross chu Muller-a'n box chhungah la thlain a pet goal. Germany goal hi team goal a ni a, Muller-a'n ball a chan hma hian Florian Wirtz, Leroy Sane, Ilkay Gundogan, Antonio Rudiger, Serge Gnabry leh Henrichs ten ball an inpe kual nalh hle.

France pawhin Aurélien Tchouaméni leh Antoine Griezmann te hmangin chance insiam ve bawk mah se keeper Marc-André ter Stegen-a'n a hna a thawk ṭha. Germany erawhin hun ṭha an inbawhpelh lo a, minute 87-naah Kai Havertz ball pek chu Leroy Sane-a'n ṭha takin a khung.

Sane-a'n goal ṭha a khung hnuah ṭul lo zetin Eduardo Camavinga a ti tlu a, penalty a chawi. Les Bleus captain Griezmann-a'n minute 89-naah penalty aṭangin siphurh sut ṭhen mah se goal dang khung belhna tur hun a awm tawh lo.

Inkhel hi friendly match chauh ni mah se Germany tan chuan chak hi a hlu. Manager hna chelh lailawktu Rudi Voller chuan, "First half-ah kan khel ṭha thlawt a, second half-ah dinhmun sawhnghetin theihtawp kan chhuah. Friendly match chauh ni mah se France laka chak hi a hlu. Match hnuhnung bera kan chak loh avangin tun ṭuma kan chak hi kan lawm hle," tiin a sawi.

Germany coach tur hi tih chian a la ni lo a, Voller hi chu national team director ni lai niin a ngheta team enkawltu nih a tum lo. Bayern Munich manager hlui Julian Nagelsmann hming lamrik a ni a, kumin October thlaa USA leh Mexico nen friendly match an khelh hunah chuan Germany enkawl tur hi a chiang tawh ang.