Three Lions hahum ri a la ring reng e!
England chuan international friendly match-ah harsatna nei loin Scotland chu 3-1 in an hneh a, Phil Foden, Jude Bellingham leh Harry Kane ten goal khat ṭheuh an khung - Scotland tana goal khungtu hi Harry Maguire a ni!
Three Lions hian Foden leh Bellingham hmangin first half-ah goal an khung a, minute 67-naah England defender Maguire chuan an lamah tilutin, Scotland si phurh a sut ṭhensak.
Mahse, England tan Harry Kane chuan minute 81-naah khung lehin chak a nemnghet a, an match hnuhnung pakuaa tlawm nei miah lo Scotland tan friendly match mah ni se, England nena an inhal dan te ngaihtuah chuan result lawmawm lo a ni.
Kum 1999 hnuah Scotland hian England hi an la hneh ve leh lo a, an kal tluan vanglai taka mikhualin hnehna chan an inbeisei - mahse, team pahnih squad a inchhah hleih deuh hlek a, a tawpah England an chungnung ta zawk.
England beiseina
Tun hnaiah England-in player beiseiawm tak tak an nei nual a, chung zingah chuan Phil Foden leh Bellingham te an awm - anni pahnih hian an kum phu loin hlawhtlinna an chhar hnem tawh a, England beiseina kengtu, tia sawi ngam an ni.
Minute 32-naah Foden chuan a team beiseina a tihlawhtling nghal a, Kyle Walker-a siamsak chu goal-ah a chantir - Manchester City midfielder Foden-a chet ranna leh finna sawi hmaih a thiang lo a, goal luhna tura an ball lakluh chu a hmuhnawm hle.
England-in an la duhtawk mai lo. Goal an khung aṭangin minute thum a liam awrh a, Andy Robertson a fimkhur tawk lo. Scotland captain hian a ball petna tur en loin, Bellingham a pe a,Real Madrid midfielder hian goal-a chantir turin harsatna a tawk lo.
Hampden Park-ah goal dang lut loin chawlhlawk hman a ni a, Scotland ṭantuten an beiseina thamral mek chu an en a, kum 150 zet an hmelma lo ni tawh laka an tlawmna chu Scotland ṭantute tan chuan na tak a ni.
Beiseina siamtu Maguire
Minute 67-na a ni a, Scotland-in beiseina an nei - an beiseina siamsaktu erawh England defender Harry Maguire a ni a, Manchester United-in a captain nihna an hlihsak defender hian ngai a awh hleithei meuh lo.
Liverpool left back Robertson-a ball cross chu Maguire hian lo dan a tumna lamah an lamah a ti goal a, Three Lions tana goal vengtu Aaron Ramsdale tan dan a harsa.
Scotland an phur sawt a, mahse, goal an khung thei tlat lo. Hun tawp nan minute kua chauh a awm tawh tihah England bawkin goal an khung nawn a, captain Harry Kane chuan a khung - ram tana goal 59 a khungna chiah a ni.
Kane-a finishing a tawih a, chutihrual chuan a siamsaktu Bellingham ball pek a mawi a, Real midfielder-in ball a lakluh dan pawh player class sang bik tih awm renga mawi a ni - a pawimawh berah chuan England an chak a, beiseina sang tak an neih chhunzawm zel ang.