Saudi-in South Korea an ngam lo

Nipui transfer-a Saudi Pro League-in sum an hman hnem avangin Saudi football-in ngaihven a hlawh thar a, khawvel huap pawha coach langsar Roberto Mancini-a'n a enkawl avangin Saudi Arabia lakah beiseina a sang bawk.

Mahse, Saudi-in an league-ah khawvela footballer langsar ber ber thlem lut thei mah se, national team erawhin hma an sawn phah lo - Thawhlehni zan khan South Korea chu friendly match-ah 1-0 in an ngam lo a, an match hnuhnung parukah an tlawm vek!

Kum khata euro maktaduai 25 hlawh nia an sawi Mancini enkawlna hnuaia an match hnih khelhna niin, an la tlawm ve ve a, Italian coach hian khawvel chu sawi loh, Asian football-a team hmuhnawm pawla Saudi Arabia chher turin hun a la mamawh niin a lang.

Newcastle United khelmual St. James' Park-a inkhelah hian South Korea tan Cho Gue-sung chuan goal awmchhun a khung a, Danish Superliga club Midtjylland striker hian ram tan match 26-a goal sarih a khungna chiah a ni.

South Korea hian tun international break-ah match hnih khelin, match hmasa zawkah Wales chu 0-0 in an lo inhnehtawkpui tawh bawk.