Maguire chhantu Gareth Southgate
England boss Gareth Southgate chuan a player Harry Maguire a chhan a, tun hnaia fiamthu thawh nana hman nasat tak a defender chu dik lo taka bitum bik nia a hriat thu a sawi.
Southgate chuan, "A chunga an chet dan anga player dang chunga chet dan ka la hmu lo. Hun rei tak chhunga England team hlawhtling ber pawlah a tel a, kan tan player pawimawh tak a ni bawk.
"Kan senior player-te ṭangkaizia hi ka sawi fo ṭhin a, chung zingah pawh chuan a tel. Khelmual a luh apianga a paukhauhna a pholan ṭhin hi ropui tak a ni. Top player a ni a, a lam kan ṭang tlat reng. Kan fan-te pawh a chungah an ṭha êm êm a ni," a ti.
Kum 30 mi Maguire hian Scotland lakah ram tana a match 59-na khelin, an lamah a ti goal - World Cup 2018 semifinal leh Euro 2020 final khel thei England team-ah player pawimawh a ni phak.
Mahse, Southgate-a'n a ring viau chungin United lamah chuan Maguire duh lotu fans tam tak an awm. Tun nipuiah Red Devils captain a nihna chu hlihsak a ni a, Old Trafford chhuahsan thei dinhmunah ding mah se defender dang an inhliam avangin United-in an chhuahtir leh ta lo.
Maguire hi Scotland lakah bench aṭanga luhtir a ni a, Scottish fan-ten an au el nasa hle. Southgate chuan, "Scotland fan-te kha ka hrethiam a, sawisel thei ka ni lo. Chutihrual chuan mi tam takin an sawiselin, fiamthu thawh nan an hmang a, chumi avang chuan khatiang kha a tawng ta zel a ni ber.
"Kan commentator, pundit leh mi tam tak hian a nihna ai baka nasain thil hi an lantir a ni," a ti a, Maguire chunga thil thleng chu na takin a sawisel - Kane lakchhuah a nih avangin Maguire hian captain armband a hreng zui.
Southgate chuan, "Inkhelh zawhah pawh a tih tur a nih angin media a hmachhawn lehnghal mai a, kha khan rilru paukhauh tak a nihzia a pholangin ka hria. Hruaitu a ni tih a lantir a, a huaisenna hian fak a phu a ni," a ti a, an hlawhtlinna kalkawngah Maguire chuan hmun pawimawh tak a chan thu a sawi bawk.
Inkhel Result
Scotland 1 - 3 England
SCO: Harry Maguire 67'
ENG: Phil Foden 32'; Jude Bellingham 35'; Harry Kane 81'