Boxer 298 inziak lut tawh

Tualchhung boxing inelna lian LPS Pro Fight boruak a nung chho zel a, inelna hmachhawn tum boxer 298 zetin hming an pe lut tawh. Inelna category panga a tel tur tan September 20, Nilaini thleng hming pekluh theih a ni ang.

Pro Fight lawmman tih tih pun a nih tur thu an puang tawh a, tun hnai khan boxer ṭha ber hnenah Ather Electric Scooter 3X pek a nih tur thu an puang leh a ni, scooter hi MST Motors lam tumsak tur a ni dawn.

Kum 2009 aṭang khan Pro Fight hi buatsaih a ni tawh a, boxer ṭha berin lirthei an la dawng ngai lo. Nikum khan flyweight-ah Ramthar Lunglei boxer Laldinsanga a champion a, KT Enterprise Best Boxer lawmman Panasonic washing machine a dawng.

Dinsanga hian weight hrang pahniha champion nih a tum a, kuminah chuan fly kalsanin bantam-a tel turin application form a thehlut. Nikumah vawi nga champion tawh NT Lalbiakkima a tel lo ve thung a, tun tumah fly-ah a tel dawn tih a sawi chiang tawh a ni.