Kum li chhung atan Halep an hrem

Grand Slam vawi hnih champion tawh Simona Halep chu kum li chhung inkhel thei lo tura hrem a ni, hrem a nih chhan hi damdawi hman phal loh a hmang tih an hmuhchhuah vang a ni.

Romanian nula Halep hian dan a bawhchhiat loh thu a sawi thung a, infiamna lama thubuai ngaihtuahtu sang ber Court of Arbitration for Sport (CAS) hnenah a zualko dawn tih a sawi ve thung.

Season hmasa US Open an khelh lai khan Halep hian damdawi hman phal loh a hmang niin an sawi. Wimbledon leh French Open champion hlui hi kum 2022 October thla aṭang khan hrem lailawk a lo ni tawh.

Kum 31 mi Halep chuan, "Nitin ṭha takin training ka nei chhunzawm dawn a, min puhna leh ka chunga thutlukna an siam hi a dik lo a ni tih a takin ka finfiah dawn a ni. Court of Arbitration for Sport ka pan dawn, thil ṭul leh pawimawh zawng zawngah hmalak a ni ang.

"Nikum kha ka tana hun harsa leh inkhelh harsat ber ṭum a ni a, hliam vanga ka buai hrep hnuah dik lo taka puh ka ni leh bawk. Kumin tir lamah phei chuan chawlhkar tin deuhtawh min endik, ka tih dik loh an hmu lo," tiin nikuma an endikna chu dik tawk loah a ngai.

A kum ngaihtuahin Halep hi kum li chhung an hrem a nih chuan atan tennis zinkawng a tawpah a ngaih theih. Tun hma pawhin Maria Sharapova chuan hremna a lo hmachhawn tawh a, mahse CAS hnena a khinlet hnuah hremna pawhtawisak a lo ni tawh.