Argentina leh Brazil an chak

World champion leh world number 1 ni bawk Argentina chuan South American World Cup qualifying bul an ṭan fuh hle, match hnih an khelh tawhah an la chak ve ve. Anni ang bawkin Brazil chuan match hnih aṭangin point ruk an hlawh chhuak ve bawk.

South American ram 10 inel zingah Argentina leh Brazil te chauh hi match hnih aṭanga point hloh lo thei an ni a, player an neih ṭhat miau avangin an chak zel hi a mak lo. World Cup 2026 khel tur erawhin hmabak a la tam hle.

Ram 10 inelna hi hi vawi hnih ṭheuh an inkhel chhuak dawn, chumi hnua point hmu sang panga chu an tling nghal ang. Paruknain Inter-Confederation playoff an khelh a ngai dawn a ni.

Messi tel loin

Argentina tan Lionel Messi zin chhuak ve mah se a inkhel lo. La Albiceleste captain hian Ecuador an hneh ṭumin hliam tenau a tuar a, na tak ni hran lo mah se coach Lionel Scaloni-a'n a chhawr lui duh lo, khelmual sir aṭangin a ṭhiante inkhel a lo en.

Thawhlehni zan La Paz-a inkhelah Argentina tan Chelsea midfielder Enzo Fernandez chuan minute 31-naah goal hmahruai a khung a, goal luh aṭanga minute riat hnu lekah Bolivia defender Roberto Fernández chu hnawhchhuah a ni.

Chawlhlawk hmain Nicolas Tagliafico-a'n a khung belh a, chak tur a chiang tawh. Second half-ah Argentina lamin nuamsa takin an khel tawh a, player inlan tam lo panga ngawt dah luh an ni - hun tawp dawnah Nicolas Gonzalez chuan chak a nemnghet.

Argentina coach Scaloni chuan, "Player zawng zawng an inringtawk vek, ball chan chakin an za zek zek vek a ni ber mai," a ti. An captain Messi chu dam hman tumin bei mah se inkhel turin a inpeih hman lo tih a sawi bawk.

Brazil leh midang

Nimin zing inkhelah Brazil an chak zo lo teuh hle, hun tawp hma chiahin Neymar-a corner pet chu defender Marquinhos chuan a lo tauhlut a, khualmualah Peru 1-0 a hnehin point thum an hlawh chhuak hram a ni.

World champion vawi nga ni tawh Brazil tan Neymar a hlawhawm a, mahse an ram tana goal khung hnem ber a nihna a belhchhah thei rih lo, forward Raphinha-a'n hun ṭha bik nei mah se Pedro Gallese chuan a lo dansak.

Inkhel dangah Chile tan Alexis Sanchez chuan inkhel bul a ṭan a, khel hmuhnawmin an match hmasa aiin khel ṭha zawk viau mah se goal an khung thei lo, an mikhual Colombia nen 0-0 in an inhnehtawk a ni.

Ecuador chuan Uruguay 2-1 in an hneh, mikhual Uruguay lamin Agustin Canobbio hmangin goal nei hmasa mah se, mualneitu Ecuador tan Felix Torres chuan Chelsea midfielder Moises Caicedo siamsak hmanga an sut bakah chakna goal a khung bawk.