Ukraine hnehtu Italy tan beiseina thar

Euro 2024 qualifier khelh mekah Italy chuan 2-1 in Ukraine an hneh a, nakkumah European Championship khelh tur atan beiseina an nei thar ve leh ta - Italy tan Davide Frattesi chuan goal hnih a khung a, Ukraine tana Andriy Yarmolenko goal khungin awmzia a nei phak lo.

Italy hian hnehna an chan avangin match liah point sarih an nei ta a, an hneh tak Ukraine leh North Macedonia nen an point hmuh zat a inang chiah - hetihrual hian Azzurri hian team pahnih aiin match khatin an khel tlem zawk tih hriat tel a ṭha.

Group C-ah hian match nga aṭanga point 15 neitu England chuan hma an hruai mek a, Italy, Ukraine leh Macedonia te point hmuh zat a inan vek avangin an group hi a ngaihnawm chho zel dawn niin a lang.

Kawng harsa

Italy hian boss thar Luciano Spalletti an nei a, Italian coach hi season hmasa Serie A-a Napoli champion puitu a nih avangin a chungah beiseina an nei sang hle - mahse, beisei ang ngawt erawhin thil a kal bik lo.

Spalletti hnuaia an match hmasa berah Italy hian North Macedonia chu an inhnehtawkpui a, goal khung ṭhang Ciro Immobile chuan goal hmahruai khung mah se Macedonia hian minute 81-naah Enis Bardhi freekick hmangin an chhanglet.

Italy elpui zingah England leh Ukraine an tel avangin hneh ngei tura ngaih laka an result hi a lawmawm lo a, Euro champion lai hian World Cup 2022 an khelh loh hnuah Euro 2024 khelh loh mai an hlauthawng hman.

Thawhlehna chu

Mahse, Italy an indawmkun reng lo - tun international break-ah vek an insiamrem lehnghal a, team ṭha Ukraine an hneh. An elpui team an nih tel avangin Ukraine laka chak hi Italy tan a hlu lehzual.

Azzurri tan hian Davide Frattesi chuan minute 30 pawh a tlin hmain goal hnih a khung hman a, Sassuolo aṭanga Inter Milan-a loan-a khel mek striker hian 'level' sang khel tlak a ni tih a pholang.

Ukraine tan Andriy Yarmolenko chuan minute 41-naah si phurh a sut ṭhen a, mahse, hun tawp thlenga goal dang an khung tawh loh avangin Italy an chak. Italy boss Spalletti chuan, "Italy enkawl hi nuam ka ti a, vanram chen ang mai ka ni," tiin inkhelh zawhah a sawi.