Pune lama zir tur pathum thlang

Mizo rawlthar pathum - David Lalzawmdika (96kg), Sialhawk; Isak Malsawmtluanga, Ramhlun Vengthar leh Laithanpuia (55kg), Sairang Dinthar te chuan Army Sports Institute, Pune-ah weightlifting an zir dawn.

Kumin August 10-11 khan Mizoram Weightlifting Academy, Ramhlun Sports Complex-ah Weighlifting State Championship neih a ni a, he hunah hian ASI weightlifting coach M Syamlal leh Nikhil Singh te an lo kal a, anni hian Pune lama zir tur hi an thlang.

Army Sports Institute, Pune-ah hian training ṭha lehzual zawk an nei dawn a, kum 17 an tlin hunah army an zawm chhunzawm nghal ang. Pune hmuna awm ASI hi Jeremy Lalrinnunga leh Zakhuma te lo zirchhuah tawhna hmun kha a ni.

Tun dinhmunah hian Pune-ah hian Mizo pariat - Jeremy Lalrinnunga, Lalzuidika, Zakhuma, TBC Lalchhanhima, Lalhunthara, Vanlalruata, Jacob Vanlaltluanga leh Silvan Beihrothatlo te an awm mek.