Goal nga khungtu Belgium

Euro khelh tum Belgium-in Estonia hneh turin harsatna an tawk lo a, goal nga ngawt an khung - mikhual team lakah hian 5-0 in an chak a, qualifier match nga khelh tawhah goal an la chhuah lo tluang zel.

Belgium tan Chelsea duh loh Romelu Lukaku chuan innghahna tlak a la ni reng tih pholangin goal hnih a khung a, Jan Vertonghen, Leandro Trossard leh Charles De Ketelaere ten goal khat ṭheuh an khung bawk a, Estonia lamin a chhanletna tur an nei lo.

Group F-ah Belgiaum hian point 13 neiin hma an hruai mek a, chutihrual chuan 3-1 a Sweden hnehtu Austria nen an point hmuh zat leh khelh zat a inang - Austria tan hian Marko Arnautovic chuan goal hnih a khung.

Austria tan Michael Gregoritsch chuan goal hmahruai a khung a, Arnautovic chuan belhchhahin, Inter Milan striker hian a goal hnihna chu penalty aṭangin a khung. Sweden tan minute 90-naa Emil Holm goal khungin awmzia a nei phak tawh lo.