MotoGP thleng turin India a inbuatsaih ṭha

Bike intlansiakna sang leh ngaihhlut ber MotoGP chu a vawi khat nan India ramah tlan a ni dawn. September 24, Pathianni chawhnu lamah Grand Prix of India hi Buddh International Circuit-ah tlan a ni ang.

Buddh International Circuit-ah hian kum 2011-2013 chhung khan Formula 1 an lo tlan tawh, car intlansiakna sang ber thleng tawh mah se an tlan lohna a nei tawh - kum 10 a liam tawh a ni. MotoGP tlan nan hian tlankawng leh a sir velte chu chei ṭhat a ni.

Indian GP atana Chief Operating Officer Pushkar Nath Srivastava chuan, "Kawng kawi hmasa berah kawngpui sir tihzau a ni a, rider chesual an awm palh pawha ṭha taka an tlan chhuah theihna tur hmun kan siam bawk.

"A bik takin kawng kawi zawng zawng uluk taka siamṭhat leh ennawn a ni tawh a, rider himna leh intlansiak hmuhnawm a awm theihna tur chu kan ngaih pawimawh ber a ni, tunah chuan inbuatsaihna hi peih fel a ni tawh," tiin a sawi.

Buddh International Circuit hi kum 2011 khan hawn a ni a, a siam nan hian cheng vaibelchhe 2000 hman niin 5.125km a thui a ni, kawng kawi 16 awmin kawng ngil thui lai ber chu 1.06km a thui a ni.

MotoGP season kal laiah Ducati rider Francesco Bagnaia chuan point 283 hmuin rider championship hmaharuaitu a ni mek a, amah hnaih bertu Jorge Martin chuan point 247 a hmu thung.