Thutlukna ka siam sual - Medvedev

Daniil Medvedev chuan US Open final a thlirkir a, a khingpui Novak Djokovic lakah set lak theihna remchang nei mah se, thutlukna a siam dik loh avangin set a la ve ta lo niin a sawi.

Russian tlangval hian tun hmain Djokovic hneh chungin US Open nomawi a lo chawi tawh, kuminah pawh beiseina sang tak a nei. Mahse, nomawi inchuhna inkhelah set a la ve ta miah lo.

World number 3 Medvedev chuan, "Minute 104 chhung kan inkhel a, a pawimawh laiah tak zel thutlukna ka siam fuh lo ṭhin kha a pawi. A bik takin set hnihnaah khan remchang ka hmu ṭha êm êm a, mahse a vaw sual zawkah ka ṭang.

"Kum hnih liam ta khan New York khawpuiah bawk khan match hautak kan khel a nih kha, khami ṭum kha chuan mahni inveng tak chungin ka tum angin ka khel thei, tun ṭumah erawh kan intawn hmasak anga khelh theih ngawt a ni tawh lo.

"Awmna tur hmun ka thlang dik lo fo a, a hnung lam aṭanga ka ball vuak a na tawk loin vuak sir ka tum lutukna lamah a sual a awm fo bawk. Ka khel ṭha lo tih ka pawm, chutihrualin Novak khan a khel ṭha em a ni," tiin a sawi.

Medvedev hian semifinal-ah Carlos Alcaraz a hneh thei a, player ṭha leh thiam tak a ni tih chu sawi nawn a ngai lo. Mahse, player ropui dangte elphak ve tur chuan tharum a ngah zual a ngai a, dawhthei taka inkhelh rei a zir a ngai tel bawk.

Grand Slam-ah chuan best of five hmangin chak zawk an zawng ṭhin, a tir lama che ṭha tawk lo tan pawh thawh leh theihna kawng a inhawng zau. Hetiang hunah tak hian player dangte aiin Djokovic hi a rilru puthmang a dik ṭhin.

Tun season atan chuan major tournament an khel zo tawh, a thiam zual pariat inelna ATP Finals erawh an la hmabak thung. Grand Slam khel leh tur chuan nakkum January thla chawhnu lama neih tur Australian Open an nghah a ngai dawn a ni.