MotoGP KTM leh Binder-a hun a thleng ve ta

Bike intlansiakna sang ber MotoGP huangah Mizote hriat hlawh tak KTM chuan a vawi khat nan hnehna an chang ve ta. South African tlangval Brad Binder-a'n KTM bike khalh chungin Czech Republic Grand Prix tlan zawh takah pakhatna dinhmun a luah.

KTM tana chanchin lawmawm leh mellung thar a ni a, an rider Binder pawh MotoGP bikah a chakna hmasa ber a nih avangin an ngaihlu zual. Inelna sang berah hian intlansiak vawi thum a hmachhawnna chauh niin, atan bul ṭanna ṭha tak a ni.

Pathianni zan Masaryk Circuit-a intlansiakah Brad Binder hian pasarihna aṭangin bul a ṭan, inelna neih ṭan aṭangin a che fuh chho nghal - mahni tual laia intlansiak ang maiin a tlangnel a, zawi muangin a hma lama awmte a tlan pel phei zel.

Lap kua chauh tlan hmabak an nei tawh tihin Binder hian a hma a awm Franco Morbidelli tlan pelin a hmasa berah a tlan - hnung lam hawi tawh loin hnehna a chang, a hnungah hian Yamaha rider Morbidell leh a hmasa ber aṭanga tlan ṭan Johann Zarco te an thleng.

Tun season intlansiak hmasa pahniha hnehna changtu Fabio Quartararo-a'n beisei a phak lo, pasarihnaah a thleng thei hram. Valentino Rossi chu pangana niin a kum tam deuh tawh mah se rider hmuhnawm bik a nihna a lantir zel.

Kum 24 mi Brad Binder chuan, "Mipa naupang mai ka nih lai khan engtik niah emaw chuan MotoGP-ah hian pakhatna ka la ni ve ang tiin duhthu ka sam ṭhin, tunah chuan a takin a lo thleng dik ta. Hun hlimawm ka tawn lai hian a hmunah ka nu leh pa awm thei se ka duh hle, a tir aṭanga min thlawptu an ni si a.

"Hnehna ka chan hi kei leh team hnathawh a ni, bike ṭha leh duhthusam min chhawp chhuahsak avanga hetiang dinhmun thleng thei chauh hi ka ni," a ti. KTM hian 2017 aṭang khan MotoGP an luhchilh pumhlum a, season li an hmannaah a vawi khat nan chak ni hmel an hmu ve chiah.

Dawhsan (podium) lawn chinah awm lo mah se Rossi a lungawi. Italian legend chuan, "Jerez-ah khan kan tlan ṭha thawkhat a, tun ṭum chu a boruak zawng zawng nen khan a nuam ta hle. Intlansiak hi nuam ka la ti hle a, chet ṭhat chhunzawm pawh ka inbeisei," a ti.

MotoGP champion lai Marc Marquez chu Czech Republic-ah hian a la inlan thei lo. Spanish tlangval hi tun hnaiah a ban ruh tliak vawi hnih zai a ni a, a team Repsol Honda chuan an rider hi 100% a dam chiang lo chung chuan intlansiak luih tir an duh lo.

Marquez hi champion leh ngei tura ngaih a ni a, mahse Spanish Grand Prix an tlan ṭumin a che sual. Intlansiak pathum an neih chinah point a la nei ve lo, a elpui tur Quartararo chuan point 59 a khawl tawh thung - an inkar a zau dawn ta hle.

August 16, Pathianni hian Australian Grand Prix an tlan leh dawn a, he hunah hian Marquez pawh inlan thei tawh tura beisei a ni. Inelna pakhatah hian a hmasa bera thlengin point 25 a hmuh nghal theih avangin Honda rider tan nomawi beiseina la bo vek bik lo.