A chung berah Aizawl FC hnehtu Chawnpui FC

Zote Toyota MPL10-ah champion lai Chawnpui FC-in an par an chhuah a, nimin khan I League club Aizawl FC chu 2-1 in an hneh. Lalrindika Hmar hote hian point thum hlu tak an hlawhchhuah bakah Chanmari FC leh Mizoram Police an inhnehtawk avangin table-ah pakhatnaah an awm.

1st Bn MAP Ground-a inkhelah hian first half-ah goal a lut lo. Second half-ah Chawnpui FC tan Peter Lalrinhlua leh substitute David Lalchhuanawma ten an khung a, injury time-a Aizawl FC forward R. Ramdinthara goal khungin result a ti danglam pha lo.

Big Match

Aizawl FC hi MPL club zinga I League khel pha awmchhun an ni a, team dang zawng hneh châk an ni. Amaherawhchu, MPL10-a squad nei ṭha ber AFC hian match hmasa paliah hneh loh an tawng lo a, an elpui Chawnpui lakah a vawi khat nan an tlawm.

Chawnpui FC hi champion nawn tum an ni a, Rindika Hmar hoin team thar an din. Season liam ta MPL best defender Lalruatfela a dam leh tawh a, AFC hmachhawn ṭumin captain armband a hreng.

Football hmuhnawm

Aizawl FC-in player ṭha neih an lantir a, passing game hmuhnawm an pho chhuak. Amaherawhchu Ruatfela hoa Chawnpui tlarhnung an paltlang thei lo a, chance siam an harsat.

Chawnpui FC pawhin first half-ah chance ṭha bik an nei lo a, an inveng tawn hle. Second half-ah erawh chak an tum ve ve avangin an nawrna hret. David Lalchhuanawma luh hnuah Chawnpui goal bawh a na sawt bawk.

Salem Veng tlangval lian ṭha David-a'n ball kang a chang thei a, a ball tauh pial ṭha chu Tea Chinzah-in vei lam aṭanga lalutin a ball cross chu Peter Lalrinhlua'n minute 62-naah goal-ah a chantir.

Aizawl FC-in siphurh sut an tum an nawr a, sut tumin player pawh an siksawi. Player thlak zingah keeper Joel Lalramchhana pawh a tel a, a inhliam vang a ni thung.

Minute 77-naah AFC midfielder KC Larchhuakmawia chu mual sir buainaa insum zawh loh avangin hnawhchhuah a ni a, player 10-a an khelh a ṭul phah. Minute 82-naah David-a'n box pawn aṭangin a pet lut a, keeper Vanlalhriatpuia'n a en liam. Chawnpui hi 2-0 a hma an hruai bakah player pakhata an tam tawh avangin awlsam taka chak tura ngaih an ni.

Mahse, rin ang ngawt a ni lo. Aizawl FC-in Chawnpui inthlahdah an hrem a, Tharpuia'n injury time-ah siphurh a sut ṭhen. Chawnpui an buai lehzual a, hun tawp hma chiahin box pawnah AFC-in freekick an hmu. AFC tan C. Lalmuanpuia rawn pen chhuakin a pet over a, Chawnpui an thaw huai a, Rindika hote 2-1 in an chak.

AFC an buai?

Aizawl FC-in match nga aṭangin point riat chiah an la hmu a, I League club tan result ṭha a ni lo. Chutihrualin season liam ta khan AFC hi league round-ah pakhatna an ni a, semifinal-ah an tla. Palina Chawnpui an champion an ta zawk.

Mahse, Aizawl FC tan league round-a palina china awm ringawt hi lawmna a ni pha lo. I League club hian squad an nei chhah a, an buaina erawh an ṭhat dan ber an hre fuh thei lo hi a ni.

Tlarhnungah Lalmuan-awma'n (Munez) dinpui nghet a nei lo a, position dang pawh an inkawp nghet hlei thei lo. Tlarhmaah Lalrinzuala dinhmun a nghet a, player dang erawh an thlak kual ve reng. Aizawl FC ṭha ber hmuh tur a la awm lo a, an hmachhawn leh tur chu Chanmari FC a ni.

Karleh hian Kolasib-ah round 6 khelh a ni dawn a, MPL ṭantirh aṭanga la awm pahnih Aizawl FC leh Chanmari FC te inkhel tur hi a hmuhnawm khawp ang.