Asian Games-ah Ayush tel dawn

All India Football Federation chuan Nilaini khan Asian Games khelh tur atana India squad an puang a, player 18 koh zingah Dinthar tlangval Ayush Chhetri a tel - Mizoram player awmchhun a ni.

AFC Under-23 Asian Cup 2023 qualifier-a India tana feh chhuak hlim Ayush hi FC Goa player niin, season hmasa khan ISL-a a season hmasa ber a khel - match 20 an khelhah a inlan nghal vek a, Aizawl FC midfielder hlui hian ngaihven a hlawh hle.

AIFF hian Blue Tigers squad hi a hmain an lo puang tawh a, player 22 an ko. Mahse, Asian Games hi FIFA calendar-ah a awm loh avangin Indian Super League club-ten an duh chuan an player-te chhuah lo turin zalenna an nei.

Hei vang hian ISL club tam takin an player-te an chhuah phal lo a, a ṭang na zingah East Bengal an tel. Kolkata club-ah hian Mizo defender Lalchungnunga a khel a, ani hi India squad koh hmasakah hian a tel.

Mahse, East Bengal-in chhuahtir an phal loh avangin Durtlang tlangval hian châk tak chungin Asian Games a khel thei dawn ta lo. Asian Games-ah hian Under-23 squad tirh tur niin, senior player pathum a tel theih.

AIFF-in squad a puan hmasakah chuan Sunil Chhetri, Gurpreet Singh Sandhu leh Sandesh Jhinghan te an tel. Mahse, Bengaluru keeper Gurpreet leh FC Goa defender Jhinghan te hi club lamin an chuah phal lo a, squad-ah an tel dawn lo.

Heti chung hian AIFF chuan ISL club-te hi indawrna a neihpui a, club tinte chu player pahnih ṭheuh tal chhuah thei tura inremna neihpuiin, squad hi an puang ta a, a tira player 22 ko khan 18 chiah an ko ta thung - Chhetri chu senior player awmchhun a ni.

Hetihlai hian tun hnaia India team-a tel lo Lalengmawia Ralte (Apuia) chungchang chu phai lam media-ten an sawi ri a, coach Igor Stimac nen inhmu thiam loin, Asian Games-ah pawh koh a ni lo, niin an sawi.

Hriat tel ngai tak erawh Apuia hi a khelh mekna Mumbai City-ah player pawimawh a ni a, India hian ko pawh ni se ISL club hian chhuah an phal dawn lo - Mumbai club hian September 18 aṭangin AFC Champions League an khel tawh dawn a, inchhuah phal chi a ni tawh lo.

Phai lam media ṭhenkhat chuan Indian football team psychologist chuan India player-te hnenah form pein, hei hi lo dah khat vek turin a hriattir - Apuia chuan hei hi a zawm lo a, psychologist hian coach Igor Stimac hnenah a hrilh zui.

Hei hi May thlaa India-in Intercontinental Cup a khelh lai kha a ni. Stimac chu Apuia chungah hian a lungawi lo hle niin phai lam media chuan an tarlang a, hei vanga squad-a tel lo zuiah an ngai.

Mahse, Apuia chuan, "An form sawi hi eng nge a nih ka hre lo a, an thil ziah hi a dik lo. AFC Champions League kan khelh dawn avangin ka tan chhuah a rem lo hrim hrim bawk," tiin Vanglaini a hrilh.

AIFF chuan ISL club-te chungah lawmthu an sawi a, president Kalyan Chaubey chuan, "Kan hun neihte a tawt êm êm a, inher rem pawh a harsa ṭhin hle. Indian football team tan chauh a ni lo a, ISL club-te tan pawh a harsa ve vek a ni," a ti a, ISL club-te a hriatthiam thu a sawi.

Asian Games khelh zawhah Indian national team chuan international break-ah Football Association of Malaysia buatsaih Merdeka tournament an khel ang a, World Cup qualifier leh Asian Cup-in a zui ang.

Hangzhou, China-a neih tur Asian Games-ah hian India chuan September 19 hian inelna thlengu China nen an match hmasa ber an khel dawn a, Bangladesh leh Myanmar te an hmachhawn zui leh bawk ang.

Asian Games football-ah hian ram 23 an inel dawn a, heng ramte hi group parukah ṭhen hran an ni - group pangaah team pali zel awmin, group pakhatah team pathum an awm thung.

Group tina a sang pahnih chu round of 16 lut chiang tur an ni a, pathumna zinga a tiṭha zual paliin an lut bawk ang. India tan China an khirh deuh rinawm mah se, Bangladesh leh Myanmar an hmachhawn tel dawn avangin beisei tur a awm.