Man City-ah Guardiola a kir

Premier League champion Manchester City chuan an manager Pep Guardiola chu Barcelona aṭangin Manchester khawpuiah a kir leh tawh tih an sawi a, tun kartawpa West Ham an lenchilh hunah a naute a ho theih tawh a rinawm.

Guardiola hi enkawl a ngaih avangin an ramah a haw a, chawlhkar thum chhung enkawl a ni. A awm loh hlanin assistant coach Juanma Lillo chuan a hna a lo thawhsak - Sheffield United leh Fulham te an lo hneh a ni.

Tun season Premier League bikah Manchester City hian match li khel tawhin hnehna an la chang fai vek a, anni chiah hi 100% chak record nei thei an ni. An hnuaiah hian Tottenham, Liverpool, West Ham leh Arsenal ten point 10 an hmu.

International break an nei a, player tam tak mahni ram tan an feh chhuak. Citizens player ṭha te pawh ram tan an inlan a, tunah chuan Spanish coach kaihhruaina hnuaiah an inbuatsaih leh ṭan ta a ni.

Ram tana an inlan zawh hnu, an lo kir lehna inkhel hmasa hi club lian ṭhenkhat chetsual fo tawhna a ni. Man City pawh season bul ṭan fuh tak Hammers khelmualah an lenglut dawn a ni a, fimkhur taka an chet a ngai ang.